दुर्घटनामा व्यवसायी मुडवरीको मृत्यु

हेटौंडा । मदन भण्डारी राजमार्ग अन्तर्गत हेटौंडा—सिन्धुली सडकख्ण्डको मकवानपुरको वाग्मती गाउँपालिका–४ सादेपुलमा स्कुटर र ट्याक्टर ठोक्किँदा एक जनाको मृत्यु भएको छ ।

दुर्घटनामा हेटौंडा–१३ का ४५ वर्षीय केशव मुडभरीको मृत्यु भएको हो ।

बुधबार राति फापरबारीबाट हेटौंडातर्फ आउँदै गरेको ना ६६ प ९३०३ स्कुटर र विपरीत दिशाबाट जाँदै गरेको ना ७ त २२५९ नम्बरको ट्याक्टर ठोक्किएर दुर्घटना हुँदा गम्भीर घाइते भएको उनको उपचारको क्रममा हेटौंडा अस्पतालमा मृत्यु भएको जिल्ला प्रहरी कार्यालय मकवानपुरले जनाएको छ ।

मुडभरी विद्यालय सञ्चालक र स्टेसनरी व्यवसायी समेत थिए । उनले केही वर्ष पत्रकारितासमेत गरेका थिए । प्रहरीले ट्याक्टर नियन्त्रणमा लिएको छ भने चालकको खोजी कार्य भइरहेको जनाएको छ ।