प्रचण्ड-ओलीलाई सभामुखले भने- अध्यादेशबाट अघि बढ्दा सदनको महत्व घट्छ, सहमतिमा पुग्नुहोस्

काठमाडौं । सभामुख देवराज घिमिरेले प्रधानमन्त्री पुष्पकमल दाहाल प्रचण्ड र एमालेका अध्यक्ष केपी शर्मा ओलीसँग भेटेर प्रमुख विपक्षी दलसँग सहमति गर्न आग्रह गरेका छन् ।

बालुवाटार पुगेर प्रचण्ड र ओलीसँग संयुक्त छलफल गरेका सभामुख घिमिरेले आफू निर्वाध र सौहार्दपूर्ण ढंगबाट संसद सञ्चालन होस् भन्नेमा रहेको बताए ।

उनले भने, ‘जति बल गरेर संसद चलाए पनि एक क्षणमा त सहमति गर्नैपर्छ । पछि होइन, अहिल्यै सहमति गर्नुहोस् । भोलि बिहान ११ बजेअघि नै सहमतिमा पुग्नुहोस् ।’

नीति तथा कार्यक्रम पास गर्न, प्रधानमन्त्रीले विश्वासको मत लिन र बजेट प्रस्तुत गर्ने कार्य असमझदारी र अवरोधका बीच गर्दा राम्रो सन्देश नजाने सभामुख घिमिरेको भनाइ थियो ।

उनले थपे, ‘सार्वजनिक सञ्चारमाध्यममा आए जस्तो अध्यादेशबाट बजेट ल्याउने परिकल्पना संविधानले गरेको छैन । अध्यादेशबाट बजेट ल्याउने, कानून ल्याउने हो भने संसद र जनप्रतिनिधिको महत्व घटेर जान्छ ।’

अहिले सहमति खोज्न बालुवाटारमा सत्ता पक्ष र कांग्रेसबीच वार्ता भइरहेको छ ।