माधव बूढानीलकण्ठ गएको भोलिपल्टै बालुवाटार पुगे झलनाथ, वाम सहकार्य सुदृढ बनाउनेबारे छलफल

काठमाडौं । प्रधानमन्त्री पुष्पकमल दाहाल ‘प्रचण्ड’ र नेकपा एसका सम्मानित नेता झलनाथ खनालबीच भेटवार्ता भएको छ । प्रधानमन्त्री प्रचण्ड भेट्न खनाल बिहीबार बिहान बालुवाटार पुगेका हुन् ।
प्रधानमन्त्री प्रचण्डसँगको भेटमा पछिल्ला समसायिमक राजनीतिक अवस्थाबारे छलफल भएको नेता खनालले बताए ।

प्रधानमन्त्रीसँग नेता खनालको संघीय सरकार र प्रदेश सरकारहरूमा पनि वाम सहकार्यलाई सुदृढ बनाउँदै लैजाने विषयमा छलफल भएको जनाइएको छ । प्रचण्ड नेतृत्वको सरकारलाई निरन्तरता दिने कि विकल्प खोज्ने भन्ने विषयमा नेकपा एसमा दुई धार छ ।

नेकपा एसका अध्यक्ष माधव नेपाल हिजो कांग्रेस सभापति शेरबहादुर देउवाले राखेको विपक्षी मोर्चाको बैठकमा सहभागी भएपछि नेता खनाल आज बालुवाटार पुगेका थिए । अध्यक्ष नेपाल एमाले नेतृत्वको सत्ता समीरणप्रति सन्तुष्ट छैनन् ।

हिजो देउवासँग नेपाल मधेश र सुदूरपश्चिम प्रदेश सरकारबारे छलफल गरेको बताइन्छ । तर, नेता खनाल पक्षधर संघदेखि प्रदेशसम्म वाम मोर्चालाई नै निरन्तरता दिनुपर्ने पक्षमा उभिएका छन् ।
सत्ता समीकरणमा आफू सहभागी भएपनि कुनै छलफलमा आफूलाई नसमेटेको भन्दै हिजोको विपक्षी मोर्चाको बैठकमा असन्तुष्टि व्यक्त गरेका थिए ।