गरिब तथा जेहनदार विद्यार्थीलाई सहयोग जुटाउन बेलायतमा जुर्मुरायो पर्वत वेलफेयर सोसाइटी

काठमाडौं । पर्वतबाट बेलायत पुगेका नेपालीहरुको साझा संस्था पर्वत वेलफेयर सोसाइटी (यूके)ले जिल्लाका गरिब तथा जेहनदार विद्यार्थीहरुको सहयोगार्थ लण्डनमा च्यारिटी कार्यक्रम गर्ने भएको छ । यही जुलाइ ७ मा उक्त कार्यक्रम हुने संस्थाकी अध्यक्ष अप्सरा गुरुङले बताइन् ।

उनका अनुसारसो च्यारिटीबाट उठेको रकम पर्वतका गरिब तथा जेहनदार विद्यार्थीको उच्च शिक्षामा खर्च गरिनेछ ।

च्यारिटीमा भाग लिन पर्वतका जनप्रतिनिधि र सांसदहरु पनि बेलायत पुग्ने कार्यक्रमका संयोजक तथा संस्थाका वरिष्ठ उपाध्यक्ष सुरज पौडलले बताए । उनका अनुसार गण्डकी प्रदेशकी सांसद रेखा गुरुङसहित केही गाउँपालिकाका अध्यक्ष पनि कार्यक्रममा सहभागी हुनेछन् ।

बेलायतमा रहेका पर्वतवासीको सहयोगार्थ सन् २००२ मा उक्त संस्था स्थापना गरिएको थियो । संस्थाले यसअघि कुस्मास्थित दृष्टिविहीन विद्यालयमा १० लाखको अक्षयकोष स्थापना गरेको थियो ।

पर्वतमा साक्षरतादर ८० प्रतिशतभन्दा धेरै भए पनि गरिब तथा निम्न आय भएको विद्यार्थीहरु अझै उच्च शिक्षाबाट वञ्चित छन् । यस्ता विद्यार्थीहरुलाई संस्थाले सहयोग गर्दै आएको उपाध्यक्ष भरत पौडेलले बताए ।