एमाले काठमाडौंको ७ औं जिल्ला अधिवेशन शनिबारदेखि हुने, ओलीले उद्घाटन गर्ने

काठमाडौं । नेकपा एमालेको काठमाडौं जिल्लाको ७ औं जिल्ला अधिवेशन आगामी शनिबारदेखि सुरु हुने भएको छ । एमाले काठमाडौं जिल्ला अध्यक्ष दीपक निरौलाले आगामी २६, २७ र २८ गते भृकुटीमण्डपमा अधिवेशन आयोजना गर्न लागेको बताए ।

अध्यक्ष निरौलाका अनुसार अधिवेशनको उद्घाटन पार्टीका अध्यक्ष केपी शर्मा ओलीले गर्नेछन् । जेठ २७ गते बबरमहलस्थित कार्की ब्याङ्क्वेटमा बन्द सत्र हुनेछ । बन्द सत्र सञ्चालनका लागि आनन्द पोखरेलको नेतृत्वमा ११ सदस्यीय अध्यक्ष मण्डल चयन भएको छ ।

अधिवेशनमा ५८५ जना प्रतिनिधिहरुको सहभागितामा हुने छन् । अधिवेशनमा पार्टी कामको समीक्षा, राजनैतिक, सांगठनिक र आर्थिक प्रतिवेदन प्रस्तुत गर्ने कार्ययोजना रहेको छ ।

यो अधिवेशनले राष्ट्रिय राजनीति र जनसरकारका विषयहरुमा समसामहिक प्रस्तावहरु पारित गर्ने र पार्टी विधानमा व्यवस्था भए अनुसार अध्यक्ष, उपाध्यक्ष, सचिव, उपसिचवहरु लगायत बढीमा २२५ जनाको जिल्ला कमिटी तथा अध्यक्ष र सचिवसहित बढीमा ७ सदस्य लेखा कमिटी समेत निर्वाचित गर्नेछ ।