राप्रपामा ‘एक व्यक्ति एक पद’को अभ्यास, सचिवालय प्रमुख भएपछि गुरुङले दिए विभाग प्रमुखबाट राजीनामा

काठमाडौं । एक व्यक्ति एक पदको मान्यतालाई आत्मसात गर्दै राष्ट्रिय प्रजातन्त्र पार्टीको संयोजित संगठन विभाग प्रमुखबाट महामन्त्री राजेन्द्र गुरुङले राजीनामा दिएका छन् । पार्टी अध्यक्ष राजेन्द्र लिङदेनसमक्ष उनले आज राजीनामा बुझाएका हुन् ।

अध्यक्ष लिङदेनले एक महिना अगाडि गुरुङलाई सचिवालय प्रमुखमा मनोनयन गरेका थिए । राप्रपामा महामन्त्रीहरुमध्ये एकजनालाई अध्यक्षले सचिवालय बनाउन सक्ने प्रावधान छ । एकसाथ दुई जिम्मेवारी खप्टिएपछि गुरुङले एउटाबाट पदत्याग गरेका हुन् ।

नेपाल प्रेससँग कुरा गर्दै गुरुङले एक व्यक्ति एक पदको नीतिलाई व्यवहारमा उतार्न खोजेको बताए ।

उनले भने, ‘सचिवालय प्रमुखको जिम्मेवारी पाइसकेपछि मैले संयोजित संगठन विभाग प्रमुखबाट पछि हट्ने निर्णय गरेको हुँ । एकैसाथ दुवै पद ओगट्नु वाञ्छनीय लागेन ।’ राप्रपा अध्यक्ष लिङदेनले गुरुङको निर्णयप्रति सम्मान व्यक्त गरेका छन् ।

राजीनामा दिन आएका गुरुङलाई उनले भने, ‘सबै पार्टीले एक व्यक्ति एक पदको कुरा गर्छन् । त्यसको व्यवहारिक कार्यान्वयन चाहीँ राप्रपाले गर्नेछ । यसको सुरुवात तपाईंले गर्नुभएकोमा उच्च प्रशंसा गर्छु ।’

राप्रपाको संयोजित संगठन विभागले पार्टी निकट १७ वटा संगठनहरुलाई हेर्छ । यो राप्रपाको एउटा महत्वपूर्ण विभाग हो । गुरुङले राजीनामा दिएपछि लिङदेनले अर्को नेतालाई जिम्मेवारी दिने तयारी गरेका छन् ।