एमाले नुवाकोटको अध्यक्षमा मैनाली निर्वाचित, अरु पदाधिकारी को-को ?

काठमाडौं । नेकपा एमाले नुवाकोटको अध्यक्षमा बद्री मैनाली निर्वाचित भएका छन् । शुक्रबार भएको मतदानबाट ३३७ मत प्राप्त गरी मैनाली अध्यक्षमा निर्वाचित भएका हुन् । अध्यक्षका अर्का प्रत्याशी बुद्धि प्रधानले २६० मत प्राप्त गरे । अध्यक्षका अर्का उम्मेदवार पत्रकार माधव प्रसाद तिवारीले १० मत पाएका छन् ।

त्यस्तै, उपाध्यक्षमा राजेन्द्र रमण खनाल ३४७ मतका साथ निर्वाचित हुँदा सुदर्शन नेपाल २३५ मतमा रोकिए । सचिवमा शिव चित्रकार ३०६ मतका साथ निर्वाचित भएका छन् भने प्रतिस्पर्धामा रहेका निलकण्ठ आचार्यले २८६ मत प्राप्त गरे ।

उपसचिवमा राजेन्द्र प्रकाश पाण्डे र रुपा सापकोटा निर्वाचित भएको जिल्ला कमिटीका नवनिर्वाचित सदस्य तथा प्रेस चौतारीका केन्द्रीय सचिव विष्णु तारुकेले जानकारी दिए । निर्वाचित पदाधिकारी सबै बद्री मैनाली प्यानलका हुन् भने सदस्य पनि अधिकांश मैनाली प्यानलका निर्वाचित भएका छन् ।