अन्तर्राष्ट्रिय फुटबलमा ‘सेन्चुरी’ पूरा गर्दै कप्तान किरण

काठमाडौं । साउदी अरबको दम्माममा मंगलबार यमनसँग प्रतिस्पर्धा गर्दै नेपालले विश्वकप फुटबल २०२६ को छनोट यात्रा बिट मार्दैछ ।

एसियाली छनोटअन्तर्गत दोस्रो चरणको आफ्नो अन्तिम खेलमा यमनसँग नेपाल भिड्न लागेको हो । यो खेल नेपाली समयअनुसार राति पौने १२ बजे सुरु हुने छ । यमन र नेपाल दुवै तेस्रो चरण नपुग्ने पक्का भइसकेको छ । दुवै टोली सुखद् नतिजासहित यात्रा टुंग्याउने प्रयासमा छन् ।

नेपालले ५ खेल खेल्दा एक अंक पनि जोड्न सकेको छैन भने एक गोल पनि गर्न सकेको छैन । यमनले ५ खेलमा ३ हार, एक जित र एक बराबरीको नतिजासहित ४ अंक जोडेको छ ।

यमनविरुद्ध खेल्दै नेपाली टोलीका कप्तान तथा गोलकिपर किरणकुमार चेम्जोङले सिनियर अन्तर्राष्ट्रिय फुटबलमा एक सय खेलको कोसेढुंगा पूरा गर्दैछन् । यसअघि कुनैपनि नेपाली फुटबल खेलाडीले यस्तो सफलता हात पार्न सकेको छैन । किरण सन् २००८ देखि नेपालको सिनियर राष्ट्रिय टोलीमा छन् । नेपाली टोलीले गोल गर्न सकेमा र अंक प्राप्त गरेमा आफ्नो सयौँ खेल अझ विशेष हुने कप्तान किरण बताउँछन् ।