समुद्रबाट स्पेन पुग्ने मार्गमा प्रतिदिन ३३ आप्रवासीको मृत्यु

काठमाडौं । यस वर्षको पहिलो पाँच महिनामा समुद्रबाट स्पेन पुग्ने क्रममा पाँच हजारभन्दा बढी आप्रवासीको मृत्यु भएको एक गैरसरकारी संस्थाले बुधबार जनाएको छ । यो सङ्ख्या प्रतिदिन ३३ जनाको मृत्यु बराबर हो ।

“रेकर्डहरू सुरु भएदेखि यो सबैभन्दा धेरै दैनिक मृत्युको सङ्ख्या हो”, स्पेनी परोपकारी कामिनान्डो फ्रन्टेरासले भनेको छ, “गत वर्षको तुलनामा यो सङ्ख्या डरलाग्दो रूपमा बढेको छ ।” उक्त संस्थाले समुद्री अधिकारीहरूलाई सङ्कटमा परेका आप्रवासी डुङ्गाहरूलाई सचेत गराउँछ र सन् २००७ मा तथ्याङ्कहरू सङ्कलन गर्न थालेको थियो ।

पाँच महिनामा मात्रै एक सय ५४ महिला र ५० नाबालिग गरी कूल पाँच हजार ५४ जनाको ज्यान गएको छ र यो गत वर्षको पूरै पीडितको सङ्ख्या नजिक पुगेको छ ।

दक्षिणमा सेनेगलदेखि भूमध्यसागरको तटमा रहेको अल्जेरियासम्म स्पेन पुग्न खोज्ने आप्रवासीहरूले लिएका आप्रवासी मार्गहरूको ‘विस्तृत’ विश्लेषणपछि यो वर्षको सङ्ख्या गणना गरिएको हो ।

धेरैजसो एट्लान्टिक मार्गमा थिए । त्यहाँ चार हजार आठ सय आप्रवासी स्पेनको क्यानरी टापुहरू पुग्न प्रयास गर्दा मरेको संस्थाले जनाएको छ ।

क्यामिनान्डो फ्रन्टेरासका संस्थापक हेलेना मालेनोले विज्ञप्तिमा भन्नुभयो, “हामी यी तथ्याङ्कहरूलाई सामान्य बनाउन सक्दैनौँ । यो सीमामा मानिसहरूलाई मर्न नदिने र जोखिममा परेकाहरूको जीवन बचाउन सबै उपायहरू प्रयोग गर्ने बारेमा मात्र हो ।

यो तथ्याङ्क एक वर्षपछि देखा परेको हो । यसमा ५६ हजार आठ सय ५२ जना अप्रमाणित आप्रवासीहरू स्पेनको किनारमा पुगेका थिए । यो सन् २०२२ बाट ८२ प्रतिशतले बढेको छ ।

स्पेन युरोपमा राम्रो जीवन खोज्ने आप्रवासीहरूका लागि मुख्य प्रवेशद्वारहरू मध्ये एक हो । धेरैजसोले अफ्रिकाको उत्तरपश्चिमी तटमा रहेको क्यानरी टापुहरूमा पुग्न खतरनाक डुङ्गा यात्रा गर्छन् । तर भूमध्यसागरमा बढेको सतर्कताका कारण यो लोकप्रियता बढेको छ ।

स्पेनिस टापुहरूबाट लगभग एक हजार पाँच सय किलोमिटर टाढा रहेको गाम्बिया र सेनेगल जस्ता दक्षिणतिरका देशहरूबाट आप्रवासीहरूको सङ्ख्या बढ्दै गएको छ ।