दक्षिण अफ्रिकाले भोलि ‘फुल स्ट्रेन्थ’ टीम खेलाउने, नेपालको प्लेइङ ११ मा सन्दीपको इन्ट्री

काठमाडौं । टी २० विश्वकप अन्तर्गत भोलि नेपालले साउथ अफ्रिकाविरुद्ध ‘गर वा मर’ को म्याच खेल्दैछ । सुपर ८ को सम्भावना कायम राख्ने हो भने नेपाललाई हार्ने छुट छैन ।

साउथ अफ्रिका सुपर ८ मा स्थान बनाइसकेको टीम हो । यसअघि तीनवटै म्याचमा लगातार जित हासिल गरेको शक्तिशाली टीमविरुद्ध नेपालले कठिन परीक्षा दिनुपर्ने पक्का छ ।

गुगलले नेपालको जित सम्भावना ७ प्रतिशत मात्र देखाएको छ, जुन अनौठो होइन । तर, क्रिकेट अनिश्चितताको खेल हो । यो विश्वकपमा एसोसिएट्स टीमहरुले टेस्ट राष्ट्रलाई कठिन चुनौती दिइरहेका छन् । त्यसैले नेपालले खेल अगावै हात पक्कै उठाउँदैन ।

नेपालले यसअघि साउथ अफ्रिकाको राष्ट्रिय टीमसँग कहिल्यै प्रतिस्पर्धा गर्न पाएको थिएन । विश्वकपकै एक दावेदारका रुपमा रहेको बलियो राष्ट्रसँग खेल्ने कुराले नै नेपाली समर्थक रोमाञ्चित छन् । नतिजा जे आए पनि नेपालका लागि यो एउटा ऐतिहासिक अनुभव हुनेछ । टेस्ट राष्ट्रको फुल स्ट्रेन्थ टीमविरुद्ध खेल्न पाउनु नै नेपालको निम्ति दुर्लभ अवसर हो ।

यसअघि श्रीलंकाविरुद्धको खेल वर्षाका कारण रद्द हुनु नेपालका लागि दुर्भाग्य बनेको थियो । भोलिको म्याच भने वेस्ट इन्डिजको सेन्ट भिन्सेन्टमा हुँदैछ । यहाँ वर्षातको भविष्यवाणी गरिएको छैन । नेपालले वेस्ट इन्डिजमा पहिलो म्याच खेल्न लागेको हो । भोलिको खेल किङ्सटाउनमा अवस्थित आर्नोस भेल मैदानमा हुनेछ ।

समूह चरणमा नेपाल नेदरल्यान्ड्सँग साँघुरो अन्तरले पराजित भएको थियो । श्रीलंकासँग खेल रद्द भएपछि नेपालले एक अंक पाएको हो । साउथ अफ्रिकाले भने नेदरल्यान्ड्स, बंगलादेश र श्रीलंकामाथि लगातार जित हासिल गरेको थियो । यद्यपि, श्रीलंका र बंगलादेशविरुद्धका जित संघर्षपूर्ण थिए ।

साउथ अफ्रिकाको बलिङ लयमा छ, तर ब्याटिङ राम्ररी चल्न सकेको छैन । खासगरि टप अर्डर ब्याट्सम्यानले उल्लेख्य रन बनाउन सकेका छैनन् ।

तर, अहिलेसम्म तीनवटै खेल साउथ अफ्रिकाले न्यूयोर्कको स्लो पीचमा खेलेको थियो, जहाँ ब्याटिङ निकै चुनौतीपूर्ण सावित भइरहेको छ । वेस्ट इन्डिजको पीचमा पक्कै पनि सहजता हुने छ दुवै टीमका लागि ।

हिजो बंगलादेश र नेदरल्यान्ड्सबीचको खेलले पनि यहाँ रन बन्न सक्छ भन्ने देखाएको छ । पहिलो ब्याटिङ गर्दै बंगलादेशले ५ विकेट गुमाएर १५९ रन बनाएको थियो । जवाफमा नेदरल्यान्ड्स ८ विकेट क्षतिमा १३४ रन मात्र जोड्न सक्यो ।

किङ्गसटाउनको पीचले ब्याट्सम्यान वा बलर कसलाई बढी सहयोग गर्छ भन्ने सकिने अवस्था छैन । खासमा यहाँ धेरै क्रिकेट नै भएको थिएन । सेन्ट भिन्सेन्टमा यसअघि दुईवटा मात्र टी २० म्याच भएका छन्, त्यो पनि ११ वर्ष अगाडि । मैदानको अन साइडमा ५८ मिटर लामो बाउन्ड्री छ, जसलाई दुवै टीमका बिग हिटरहरुले सदुपयोग गर्न सक्छन् ।

भोलिको म्याचमा दुवै टीमले प्लेइङ ११ मा ठूलो फेरबदल गर्ने सम्भावना छैन । साउथ अफ्रिका सुपर ८ मा पुगिसकेको हुँदा आफ्नो बेञ्च स्ट्रेन्थ जाँच गर्ने अवसर त छ, तर क्रिक इन्फोका अनुसार आफ्ना मुख्य रोजाइका खेलाडीहरुलाई नै उसले उतार्ने छ । कन्डिसनले माग गरे बलिङमा भने तलमाथि हुन सक्छ ।

नेपाली टीममा सन्दीप लामिछाने समावेश हुने लगभग निश्चित छ । उनले सम्भवतः स्पिनर सागर ढकाललाई प्रतिस्थापन गर्नेछन् । सागरले पहिलो खेलमा नेदरल्यान्ड्विरुद्ध किफायति बलिङ गरे तापनि विकेट लिन सकेका थिएनन् । सन्दीप आगमनले नेपालको ब्याटिङ गहिराइ थप बढ्ने छ । उनी ९–१० नम्बरमा आएर पनि उपयोगी रन बनाउन सक्छन् ।

भोलि नेपालको बलिङमा सबैको चासो र आशा सन्दीपमै रहनेछ । उनले आफ्नो उत्कृष्ट लय भेट्टाए भने राम्रा ब्याट्सम्यानहरुलाई पनि घुँडा टेकाउन सक्छन् । तर, लामो ग्यापपछि अन्तर्राष्ट्रिय क्रिकेटमा फर्किन लागेकाले अलिकति संशय छ नै ।

साउथ अफ्रिकाको फास्ट बलिङ नेपालका लागि सबैभन्दा ठूलो चुनौती हो । कंगिसो रवाडा, एनरिच नोर्ट्जे, ओर्टनील बार्टमनजस्ता फास्ट बलरहरुलाई सामना गर्न नेपाली ब्याट्सम्यानलाई पक्कै सहज हुने छैन । भोलिको म्याचमा नेपालको टप अर्डर चल्नु जरुरी छ । कुशल भुर्तेल र आसिफ शेखले राम्रो स्टार्ट दिएको खण्डमा नेपालसँग बलियो ब्याटिङ पंक्ति अवश्य छ ।