रविको पत्रकार सम्मेलनः डेढ घन्टा ढिला आए, प्रश्नको सामना गरेनन्

काठमाडौं । उपप्रधानमन्त्री तथा गृहमन्त्री रवि लामिछानेले आज ‘पत्रकार सम्मेलन’ आयोजना गर्दै आफ्नो सय दिने कार्यकालका उपलब्धी सुनाएका छन् । पत्रकार सम्मेलन करिब डेढ घन्टा चले पनि गृहमन्त्रीले प्रश्नको सामना भने गर्न चाहेनन् ।

गृह मन्त्रालयले साढे दुई बजे प्रेस ब्रिफिङका लागि पत्रकारहरुलाई निम्त्याएको थियो । दिइएको समयभन्दा डेढ घन्टा ढिला गरेर गृहमन्त्री लामिछाने उपस्थित भए । मन्त्रालयका विभिन्न अधिकारीहरूलाई राखेर उनले १९ पृष्ठमा आफ्नो मन्त्रालयका उपलब्धीहरूको चर्चा गरेका थिए ।

सरकारी जग्गा फिर्ता ल्याएकोदेखि हतियार बरामदसम्मलाई गृहमन्त्रीले आफ्नो उपलब्धी सूचीमा राखेका छन् । मन्त्रालयका अधिकारीहरुले आआफ्नो क्षेत्रका विषयहरुलाई प्रष्ट्याएका थिए भने बीचबीचमा गृहमन्त्रीले बोलेका थिए । पत्रकार सम्मेलनको अन्तिममा उनले आफ्नो धारणाहरु राखे ।

पत्रकारहरू गृहमन्त्रीलाई सोध्न थुप्रै प्रश्नको पन्तरो बोकेर पुगेका थिए । तर, गृहमन्त्री लामिछाने टकटकिए । सिरोहिया पक्राउ प्रकरणदेखि आरजू राणा जोडिएको टीकापुर जग्गा अतिक्रमणका विषयमा उनले मुख खोलेनन् । आफूहरूले कसैलाई पनि नजोगाउने भन्दै सोलोडोलो जवाफ दिए ।

पत्रकारले प्रश्न सोध्न पाउनुपर्ने माग गरेका थिए । तर, गृहमन्त्री लामिछानेले भने, ‘यो प्रेस मिट होइन, प्रेस ब्रिफिङ हो । निमन्त्रणामै हेर्नुस् न ।’

यति भनेर उनी जुरुक्क उठेर सरासर हिँडेका थिए । पत्रकार पनि आफ्नो बाटो तताउन बाध्य भए ।