२० वर्षअघि विश्वकपमा नेपालले दक्षिण अफ्रिकालाई हराएको त्यो खेल

काठमाडौ‌ । अमेरिका र वेस्ट इन्डिजमा जारी आईसीसी टी-२० क्रिकेटको पहिलो चरणअन्तर्गत आफ्नो तेस्रो खेलमा नेपालले शनिबार बिहान टेस्ट राष्ट्र दक्षिण अफ्रिकाको सामना गर्दैछ ।

क्यारेबियन मुलुक सेन्ट भिन्सेन्ट एन्ड द ग्रेनाडाइन्सस्थित किङ्सटाउनमा हुने यो खेलमा नेपाल गर या मरको अवस्थामा छ । २ खेलबाट १ अंक भएको नेपाल समूहको तेस्रो स्थानमा छ भने ३ खेलबाट ६ अंक भएको दक्षिण अफ्रिका शीर्षस्थानमा छ । दक्षिण अफ्रिकाले सुपर आठमा स्थान बनाइसकेको छ । सन्दीप लामिछाने उपलब्ध हुने भएपछि नेपालको मनोबल उच्च छ । अमेरिकाले भिसा नदिएका कारण अमेरिकामा भएको नेदरल्यान्ड्स र श्रीलंकासँगका दुई खेलमा सन्दीप उपलब्ध थिएनन् । नेदरल्यान्ड्ससँग पराजित भएको नेपालले वर्षाका कारण रद्द भएपछि श्रीलंकासँग अंक बाँडेको थियो ।

उल्लेखनीय के छ भने सन्दीपकै पुनरागमनपछि यसअघि नेपालले एक दिवसीय मान्यता जोगाउनेदेखि एसिया कप खेल्ने र टी-२० विश्वकपमा छनोट हुनेसम्मको सफलता प्राप्त गरेको थियो । सन्दीपले दक्षिण अफ्रिकाविरुद्ध कम्तीमा २ विकेट लिएको अवस्थामा टी-२० अन्तर्राष्ट्रिय क्रिकेटमा सबैभन्दा कम खेलमा १०० विकेट पूरा गर्ने विश्व कीर्तिमान बराबरी गर्नेछन् । हाल उनले ५२ खेलमा ९८ विकेट लिएका छन् । एक दिवसीय अन्तर्राष्ट्रिय क्रिकेटमा सबैभन्दा कम खेलमा १०० विकेट पूरा गर्ने कीर्तिमान सन्दीपको नाममा छ ।

सिनियर अन्तर्राष्ट्रिय क्रिकेटमा नेपालले पहिलो पटक दक्षिण अफ्रिकाको सामना गर्न लागेको हो ।

नेपालले यसअघि यू-१९ विश्वकपमा भने दक्षिण अफ्रिकासँग खेलेको छ । सन् २००४ मा बंगलादेशमा आयोजना भएको यू-१९ विश्वकपमा नेपालले दक्षिण अफ्रिकालाई एक विकेटले हराएको थियो । पहिला ब्याटिङ गरेको दक्षिण अफ्रिकाले केवल १५७ रनको लक्ष्य दिएको थियो । नेपालका मञ्जित श्रेष्ठले ४ तथा शक्ति गौचन, लाक्पा लामा र पारस खड्काले २-२ विकेट लिएका थिए ।

नेपालले यो खेल केवल एक विकेटले जितेको थियो । नेपालले २ बल बाँकी छँदा ९ विकेट गुमाएर लक्ष्य भेट्टाएको थियो । नेपालका लागि शक्ति गौचनले ५१ र शरद भेषावकरले २७ रन बनाएका थिए । त्यस खेलमा शक्ति गौचनले निकै टिकेर खेलेका थिए । उनले १४० बलमा २ चौका प्रहार गरेका थिए ।

त्यस विश्वकपको पहिलो चरणमा नेपालले ३ मध्ये २ खेल जितेर पनि दोस्रो चरणको यात्रा तय गर्न सकेको थिएन । समान अंक भएका इङ्ल्यान्ड र दक्षिण अफ्रिकाले नेटरनरेटमा नेपाललाई पछाडि पारेर दोस्रो चरणको यात्रा तय गरेका थिए ।