स्वर्णिमको संकल्प- रविकै नेतृत्वमा मिसन ८४, इलामले संगठन र कार्यकर्ताको अभाव खड्कायो (भिडिओ)

काठमाडौं । राष्ट्रिय स्वतन्त्र पार्टीका उपसभापति स्वर्णिम वाग्लेले चुनाव लड्न र विपक्षीका अफवाह चिर्न कार्यकर्तामा आधारित संगठन चाहिने रहेछ भन्ने आभास इलामको उपनिर्वाचनले गराएको बताएका छन् ।

रास्वपा स्थापनाको दोस्रो वर्ष पुगेको अवसरमा शनिवार आयोजित कार्यक्रममा वाग्लेले इलामको पराजयपछि कार्यकर्ता चाहिने रहेछ भन्ने लागेको बताए । ‘मास बेस’ पार्टीमात्र बन्छौं भनेर नहुने पाठ सिक्न उपचुनावले सघाएको बताए ।

अर्को प्रसंगमा वाग्लेले जसपा विभाजनपछि माधव नेपालको पार्टी पनि फुट्न लागेको र रास्वपा पनि फुट्छ भन्ने हल्ला चलाए पनि त्यो सम्भव नरहेको बताए । उनले रास्वपामा नीति र नेतृत्वबारे जलेश्वर बैठकले पारित गरेको दस्तावेजले कुनै विवाद नरहेको दावी गरे ।

वाग्लेले भने–अब तिमीहरुको रास्वपा पनि फुट्दैछ भन्नेहरुको कुरा सुन्दा हामी मुसुमुसु हाँस्छौं । रास्वपा के हो भन्ने बुझेकै छैनन् । हामी नीति र नेतृत्वमा प्रष्ट र एक ठाउँमा संगठित छौं । नेतृत्वमा हाम्रो संस्थापक सभापति रवि लामिछानेको विकल्प छैन र उहाँकै नेतृत्वमा मिसन ८४ सफल बनाउँने हो । जलेश्वर बैठकपछि तपाईहरुले हेर्नुभएको छ,नीति र नेतृत्वको बारेमा हामीमा एकरुपता छ ।

उपसभापति वाग्लेले रास्वपा अहिले शासन सन्चालन बुझ्ने क्रममा रहेको बताए । रास्वपा र यसको नेतृत्वलाई कमजोर पार्न तथा अफवाह फैलाउन पुराना पार्टीदेखि मिडियाको एउटा तत्का पुरै शक्ति लगाएर आइरहेको दावी समेत गरे ।