गगनको जिकिर- प्रचण्डलाई प्रधानमन्त्री किन बनें थाहा छैन, एमालेले जिम्मा लिँदैन (भिडिओ)

काठमाडौं । नेपाली कांग्रेसका महामन्त्री गगन थापाले प्रधानमन्त्री पुष्पकमल दाहाल प्रचण्डलाई आफू किन बनें भन्ने नै थाहा नभएको टिप्पणी गरेका छन् ।

कांग्रेस नागार्जुन नगर कार्यसमितिले आयोजना गरेको प्रशिक्षण कार्यक्रमलाई सम्बोधन गर्दै उनले प्रधानमन्त्रीलाई केका लागि भएको र प्रधानमन्त्री भएर के गर्ने भन्ने पनि थाहा नभएको तर्क गरे ।

महामन्त्री थापाले भने, ‘सरकार मूलतः एमाले र माओवादी पार्टीहरुको छ । माओवादीको प्रमुख, जो प्रधानमन्त्री हुनुहुन्छ, उहाँलाई प्रधानमन्त्री भएर के गर्ने भन्ने कुराको कुनै मेसो पनि छैन । किन प्रधानमन्त्री हुनुभएको भन्ने थाहा पनि छैन । केको लागि हुनुभएको हो, के गर्ने हो ? उहाँ प्रधानमन्त्री नभए के हुन्छ अहिले ? केही पनि छैन ।’

उनले प्रचण्ड जसरी पनि प्रधानमन्त्रीमात्रै बन्ने खेलोफड्कोमा लागेको आरोप लगाए । महामन्त्री थापाले एमालेले प्रचण्ड नेतृत्वको सरकारको स्वामित्व नलिन नै जुनियर मन्त्रीहरु पठाएको जिकिर गरे ।

उनले थपे, ‘एमाले त सरकारमा छ, छैन ? सरकारमा छ पनि, छैन पनि । सरकारमा उसले जुनियर मन्त्रीहरू पठाएको छ । हेर्दाखेरि मात्रै जुनियर मन्त्रीहरू पठाएको होइन । किन पठाएको हो भने सरकारमा आफू बस्ने पनि, तर यो सरकार मेरो हो भनेर जिम्मा नलिने ।’