स्टोइनिसको तुफानले बढारियो स्कटल्यान्डको सपना, इङ्गल्यान्ड सुपर ८ मा

काठमाडौं । अष्ट्रेलियाका ब्याट्सम्यान स्कट स्टोइनसको विस्फोटक ब्याटिङले इङ्ल्यान्डलाई टी-२० विश्वकपको सुपर ८ मा पुर्‍याएको छ । आज भएको खेलमा अष्ट्रेलियाबाट ५ विकेटले पराजित भएपछि स्कटल्यान्ड अर्को चरणमा उक्लिने ढोका बन्द भएको हो ।

अष्ट्रेलिया र स्कटल्यान्डबीचको खेल एउटै समूहमा रहेको इङ्गल्यान्डका निम्ति पनि उस्तै महत्त्वपूर्ण थियो । प्रतियोगितामा अष्ट्रेलियासँग हार व्यहोरेको इङ्गल्यान्डले स्कटल्यान्डसँगको खेलमा वर्षाका कारण अंक बाँड्नु परेपछि सुपर ८ को दौडबाट बाहिरिने खतरा बढेको थियो । तर, बाँकी दुई खेलमा ओमान र नामिबियाविरुद्ध ठूलो जित निकाल्दै इङ्गल्यान्डले आफ्नो सम्भावना जीवित राख्न सफल भयो ।

यता स्कटल्यान्डले पनि ओमान र नामिबियालाई पराजित गरेको थियो भने इङ्गल्यान्डसँग अंक बाँडेपछि अष्ट्रेलियासँगको म्याच निर्णायक बनेको हो । आज स्कटल्यान्डलाई अष्ट्रेलियाविरुद्ध जित हासिल गर्नै पर्ने दबाब थियो । यदि स्कटल्यान्डले जितेको भए उ सुपर ८मा जान्थ्यो र इङ्गल्यान्ड बाहिरिन्थ्यो ।

यता अष्ट्रेलियाले इङ्गल्यान्डलाई नकआउट गर्न स्कटल्यान्डसँग फिक्सिङ गर्न सक्ने चर्चा भइरहेको थियो । अष्ट्रेलियाका बलर जोस हेजलउडले पोस्ट म्याच प्रेस मिटमा नै आफूहरूले इङ्गल्यान्डलाई घर पठाउन प्रयास गर्ने बताएका थिए । यदि आज अष्ट्रेलियाले हारेको भए मिलेमतोको आरोप लाग्न सक्थ्यो र छानबिनको पनि बन्ने थियो ।

आजको खेलमा दोस्रो इनिङको १३ ओभरसम्म पुग्दा स्कटल्यान्डको पकडमा थियो खेल । साँच्चै अष्ट्रेलिया जानीजानी हार्न खोजिरहेको हो कि जस्तो देखिन्थ्यो । प्रायः विस्फोटक अन्दाजमा खेल्ने अष्ट्रेलियन ओपनर ट्राभिस हेडले आफ्नो शैली विपरीत सुस्त गतिमा ब्याटिङ गरिरहेका थिए । डेभिड वार्नर, कप्तान मिचेल मार्स र ग्लेन म्याक्सवेल सस्तैमा आउट भएका थिए । अष्ट्रेलियालाई ४२ बलमा ८९ रन ल्याउनुपर्ने कठिन चुनौती थियो । तर, १४ औँ ओभरपछि स्कट स्टाइरिस र हेडले गियर बदल्दै स्कटल्यान्डको बलिङ धुजा धुजा बनाइदिए ।

१४ औँ ओभरको अन्तिम ३ बलमा स्टोइनिसले दुई छक्का र एक चौका हाने । १६ औँ ओभरमा ट्राभिस हेडले लगातार तीन छक्का हाने र खेलको दिशा परिवर्तन गरे । २७ बलमा ४१ रन चाहिने सहज स्थितिमा पुग्यो अष्ट्रेलिया । लगत्तैको बलमा उनी आउट भए । आउट हुनुअघि हेडले ४९ बलमा ६८ रन जोडेका थिए ।

हेड पेभिलियन फर्केपछि स्कटल्यान्डको फेरि आशा जाग्यो । तर, स्टोइनिस आफ्नै मुडमा थिए । उनले आक्रमण जारी राखे । १७ औँ ओभरको अन्तिम बलमा स्कटल्यान्डले स्टोइनिसको पनि विकेट लिन सफल भयो । उनी २९ बलमा ५९ रन जोडेर आउट हुँदा अष्ट्रेलियालाई चाहिएको थियो १८ बलमा २७ रन ।

स्कटल्यान्डलाई आवश्यक थियो ५ विकेट । त्यसपछि टीम डेभिड र म्याथु वेडले कुनै जोखिम नलिइकन विस्तरै खेल्दै अष्ट्रेलियालाई जितसम्म पुर्याए । दुई बल बाँकी छँदा अष्ट्रेलियाले जित हासिल गर्यो । यो नतिजासँगै ईंग्ल्यान्डको सुपर ८ यात्रा पक्का भयो भने स्कटल्यान्डको हार्ट ब्रेक भयो ।