बंगलादेशसँग १० वर्षअघिको बदला लिन आतुर नेपाल

काठमाडौं । वेस्ट इन्डिज र अमेरिकामा जारी आईसीसी टी-२० विश्वकपको आफ्नो अन्तिम खेल नेपालले सोमबार बिहान बंगलादेशसँग खेल्दैछ । क्यारेबियन मुलुक सेन्ट भिन्सेन्ट एन्ड ग्रेनाडाइन्सस्थित किङ्सटाउनमा हुने खेलमा नेपालले १० वर्षअघि व्यहोरेको हारको बदला लिन प्रयास गर्नेछ ।

सन् २०१४ मा बंगलादेशमा आयोजित विश्वकपको पहिलो चरणमा नेपालले घरेलु टोलीसँग मात्र हार व्यहोरेको थिएन, सोही टोलीसँग नेट रनरेटमा पछाडि रहेर दोस्रो चरण पुग्न सकेको थिएन ।

त्यतिबेला नेपालले हङकङ र अफगानिस्तानलाई हराएको थियो । हङकङसँग पराजित भएको बंगलादेश अन्य दुई खेल जितेर समूह विजेताका रुपमा अगाडि बढेको थियो । त्यसयता पहिलो पटक विश्वकपमा सहभागी भएको नेपालले पुनः बंगलादेशसँग खेल्ने अवसर पाएको छ ।

समूहमा नेपालले नेदरल्यान्ड्स र दक्षिण अफ्रिकासँग हार व्यहोरेको छ भने वर्षाका कारण खेल रद्द भएपछि श्रीलंकासँग अंक बाँडेको थियो । नेपालको ३ खेलबाट १ अंक छ । बंगलादेश ३ खेलबाट ४ अंकसहित दोस्रो स्थानमा छ । नेदरल्यान्ड्सको ३ खेलबाट २ अंक छ भने शीर्षस्थानमा रहेको दक्षिण अफ्रिकाको ८ अंक छ ।

श्रीलंकाले पनि नेपालले जस्तै ३ खेलबाट १ अंक जोडेको छ । बंगलादेशले पहिलो खेलमा श्रीलंकालाई हराएको थियो भने दोस्रो खेलमा दक्षिण अफ्रिकासँग पराजित भएको थियो । तेस्रो खेलमा नेदरल्यान्ड्सलाई हराएर सुपर ८ पुग्ने सम्भावना कायमै राखेको छ ।

दक्षिण अफ्रिकासँग १ रनको हारपछि सुपर ८ को सम्भावना समाप्त भएको नेपाल अब बंगलादेशसँग १० वर्षअघि व्यहोरेको हारको बदलासहित दोहोरो उपलब्धि हासिल गर्ने प्रयासमा रहेको छ । बंगलादेशलाई हराउन सके सिनियर अन्तर्राष्ट्रिय क्रिकेटमा टेस्ट टोलीमाथि नेपालको यो पहिलो जीत हुनेछ ।

दक्षिण अफ्रिकालाई ११५ रनमा सीमित गरेर पनि नेपालले जीत हात पार्न सकेको थिएन । अन्तिम दुई बलमा २ रन आवश्यक रहेका बेला नेपालका गुल्शन झाले एक रन पनि जोड्न सकेका थिएनन् ।

बंगलादेशलाई नेपालले हराउन सके नेदरल्यान्ड्स पनि सुपर एट दौडमा आउनेछ, तर त्यसका लागि उसले श्रीलंकामाथि फराकिलो जीत हात पार्नुपर्नेछ । नेट रनरेटमा बलियो रहेका कारण बंगलादेश हारका बाबजुत पनि अगाडि बढ्न सक्ने देखिन्छ ।

नेदरल्यान्ड्सले नेट रनरेट करिब एक अंकले सुधार गरे मात्र बंगलादेश पराजित भएको अवस्थामा अगाडि बढ्नेछ ।

१० वर्षअघि नेपालले पहिला ब्याटिङ गर्दै निर्धारित २० ओभरमा ५ विकेट गुमाएर १२६ रन जोडेको थियो । त्यस खेलमा पारस खड्काले ४१ र शरद भेषावकरले ४० रन बनाएका थिए । बंगलादेशले १५.३ ओभरमा २ विकेट गुमाएर लक्ष्य भेट्टाएको थियो । नटआउट ३७ रन बनाएका सकिब अल हसन अहिले पनि बंगलादेशी टोलीमा छन् ।

त्यतिबेला ब्याटिङको पालो नपाएका महमदुल्लाह पनि अहिले खेलिरहेका छन् । नेपाल र बंगलादेश अन्तर्राष्ट्रिय क्रिकेटमा चिरपरिचित टोली हुन् । सन् १९९९ मा आयोजित एसीसी यू-१९ क्रिकेटको फाइनलमा यी दुई टोली भिडेकामा बंगलादेश विजयी भएको थियो ।

त्यसको एक वर्षपछि टेस्ट मान्यता पाएको बंगलादेशले सन् २००२ को यू-१९ विश्वकपमा नेपालसँग खेलेको थियो । त्यतिबेला प्लेट च्याम्पियनसिपको सेमिफाइनलमा नेपालले बंगलादेशलाई हराएर फाइनलसम्मको यात्रा तय गरेको थियो ।