प्रचण्ड–माधव समूहको स्थायी कमिटी बैठक, महासचिव चयनको एजेण्डा

काठमाडौं । महासचिव चयनमा छलफल लम्बिएपछि प्रचण्ड–माधव नेपाल नेतृत्वको नेकपाको केन्द्रीय कमिटी बैठक अझै शुरु हुन सकेको छैन ।

बबरहमलस्थित कार्की पार्टी प्यालेसमा बैठकमा भाग लिन बिहान ११ बज्नुअघिनै केन्द्रीय सदस्यहरु पुगेका थिए । तर ११ बजे निर्धारित बैठक सचिवालय बैठकका कारण १ बजेलाई सारिएको थियो ।

अहिले कार्की पार्टी प्यालेसमै प्रचण्ड माधव पक्षको स्थायी कमिटी बैठक बसिरहेको छ । महासचिव चयनबारे केन्द्रीय कमिटीमा लैजाने प्रस्तावमाथि छलफल गर्न स्थायी कमिटी बैठक बसेको हो ।

उक्त समूहको महासचिवमा सुरेन्द्र पाण्डेलाई लैजाने समझदारी भएको स्रोतले जनाएको छ । यद्यपि, भीम रावललगायतका नेताले पनि महासचिवमा दावी छाडेका छैनन् । विधान संशोधन गरेर दुई महासचिव राख्नेबारेमा समेत कुरा उठे पनि यसमा निर्णय नभएको एक नेताले बताए ।