‘समीक्षा यात्रापछि रास्वपा महामन्त्रीको संश्लेषण: नसच्चिए सकिन्छौं, बोल्ड निर्णय गर्नुपर्छ’

काठमाडौं । राष्ट्रिय स्वतन्त्र पार्टीले दुई वर्षको यात्रा पूरा गर्दा महामन्त्री डा. मुकुल ढकाल एक महिना लामो ‘समीक्षा यात्रा’ सकेर अस्ति काठमाडौं फर्किए । ८० किलोमिटर पैदलसहित ४ हजार २१६ किलोमिटरको सडक यात्राबाट उनले निकालेको निष्कर्ष पार्टीका लागि त्यति सुखद छैन ।

गत वैशाख २१ गते बसेको रास्वपा सचिवालय बैठकले देशभरको जनमत बुझ्न ढकाललाई समीक्षा यात्रामा पठाउने निर्णय गरेको थियो । त्यसबमोजिम गत जेठ ५ गते रास्वपा सभापति रवि लामिछानेले उनलाई घन्टी दिएर पठाएका थिए । ढकालले पार्टीको राजनीतिक र सांगठनिक अवस्थाबारे प्रदेश र जिल्ला तहबाट रिपोर्टिङ लिने र नागरिकका चासोहरु बुझ्ने जिम्मेवारी पाएका थिए ।

गत जेठ ६ गते रास्वपा केन्द्रीय कार्यालय घन्टीघरबाट यात्रा सुरु गरेका डा. ढकालले ३८ जिल्लाको सिमाना छुन भ्याए । यस क्रममा २ हजार ७९ जनाभन्दा बढीसँग दोहोरो संवाद र अन्तरक्रिया गरेको उनले बताएका छन् । हिमाल, पहाड र तराईका सुगमदेखि दुर्गम बस्तीसम्म पुगेर जनभावना बुझ्ने काम गरेका थिए । ठीक एक महिनापछि अस्ति सुरुङ मार्गबाट काठमाडौं प्रवेश गर्दै उनले यात्रा समापन गरे ।

डा. ढकाल अहिले आफ्नो यात्रा प्रतिवेदनको तयारीमा जुटेका छन् । तर, शुक्रबार उनले फेसबुकमा लेखेको स्टाटसलाई उनले तयार गर्ने प्रतिवेदनको ‘टिजर’ का रुपमा हेर्न सकिन्छ । डा. ढकालले पार्टीमा केही परिवर्तन गरी अघि नबढेको खण्डमा गाह्रो दिनहरु सुरु भएको निष्कर्ष सुनाएका छन् ।

उनले लेखेका थिए, ‘राष्ट्रिय स्वतन्त्र पार्टी जोगाउने वा नजोगाउने, हाम्रो औचित्य के हो ? गम्भीर र उच्च संवेदनशील प्रश्नका अगाडि हामी खडा छौं । यो प्रश्न आइसक्यो र यो प्रश्न छ भनेर सार्वजनिक स्वीकारोक्ति गर्दै हामीले हामीमा केही परिवर्तन गरी अघि बढेनौं भने हाम्रा गाह्रा दिन शुरू भए । पार्टी जोगाउने हो, नेपाली जनताको आशा, भरोसा जगाइराख्ने हो भने हामीले उच्च सचेतनासहित जोखिम लिएरै भए पनि केही बोल्ड निर्णय गरेर जानपर्छ । मलाई विश्वास छ, हामी त्यस्तो निर्णय गर्न अलिकति पनि हच्किदैनौं ।’

नेपालप्रेससँग संक्षिप्त कुराकानी गर्दै ढकालले रास्वपाको लोकप्रियतामा ह्रास आएको महसुस गरेको स्वीकार गरे ।

‘जनतामा अझै पनि रास्वपाप्रति आशा छ । तर, पहिलेको क्रेज अलिकति सेलाएको महसुस मलाई पनि भयो’, उनले भने, ‘हामी नसच्चिने हो भने सक्किने बाटोमा जान सक्छौं ।’

जनभावनाअनुरुप देशका मुख्य एजेन्डाहरुमाथि पार्टीले आफ्नो दृष्टिकोण बदल्नुपर्ने संकेतसमेत उनले गरेका छन् । यद्यपि, यसलाई मूर्त रुपमा प्रष्ट्याएनन् ।

‘म सबै कुरा प्रतिवेदनमा समेट्नेछु । जनताको भावनाअनुसार चल्न सकिएन भने हाम्रो भविष्य छैन । त्यसैले मैले दिने प्रतिवेदनमा टेकेर पार्टीले आवश्यक निर्णय लिने विश्वास छ’, उनले भने ।

देशमा परिवर्तनकारी एजेन्डाका रुपमा ल्याइएका गणतन्त्र, धर्मनिरपेक्षता र संघीयताका विषयमा डा. ढकालले जनअभिमत बुझ्ने प्रयास गरेका थिए । गणतान्त्रिक व्यवस्थासँग जनता सन्तुष्ट हुन नसकेको तथा धर्मनिरपेक्षता र संघीयतालाई जनताले पटक्कै नरुचाएको संश्लेषण उनको छ ।

अहिले पार्टी सरकारबाट हटिहाल्नुपर्ने परिस्थिति भने नरहेको डा. ढकालले प्रष्ट्याए । उनले भने, ‘त्यो गर्‍यौं भने अपरिपक्वता हुन्छ । हामीले सरकारमा रहेर नै आफूलाई प्रुफ गर्नुपर्छ ।’

केही दिनमा सभापति रवि लामिछानेलाई प्रतिवेदन बुझाउने डा. ढकालले जानकारी दिए ।