युरोकप: पोर्चुगल नकआउट चरणमा प्रवेश

काठमाडाैं । क्रिस्टियानो रोनाल्डो प्रेरित पोर्चुगल युरोकप फुटबल-२०२४ को नकआउट प्रवेश गरेको छ । प्रतियोगिताको शनिबार राति खेलिएको खेलमा पोर्चुगलले टर्कीलाई ३–० गोलले हराएको छ ।

खेल सुरु भएको २१ औँ मिनेटमै पोर्चुगलले पहिलो गोल मिडफिल्डर बेनार्डो सिल्भा मार्फत गरेको थियो ।

खेलको २८ औं मिनेटमा टर्कीका डिफेन्डर सामेत अकायदिनबाट आत्मघाती गोल गरेपछि पोर्चुगलले २–० को अग्रता लिएको थियो ।

खेलको ५५औँ मिनेटमा मिडफिल्डर ब्रुनो फर्नान्डेजले गोल गर्दा पोर्चुगललाई ३-० को सहज जित दिलाए ।

पोर्चुगलले दुई खेलबाट ६ अंक बटुल्दै नकआउटमा प्रवेश गरेको हो ।

दुई खेल खेलेको टर्की भने तीन अंकसहित दोस्रो स्थानमा छ । टर्कीको पनि नकआउट चरणमा पुग्ने सम्भावना कायमै छ ।

दुई–दुई खेल खेलेका चेक गणतन्त्र र जर्जिया भने एक–एक अंकसहित क्रमशः तेस्रो र चौथो स्थानमा छन् ।