प्रचण्डलाई रमेश लेखकको कटाक्ष- हामीलाई राम्रो प्रधानमन्त्री चाहिएको, उहाँ जादुगर भएर आउनुभयो

काठमाडौं । नेपाली कांग्रेसका प्रमुख सचेतक रमेश लेखकले प्रधानमन्त्री पुष्पकमल दाहाल प्रचण्डलाई जादुगरको संज्ञा दिएका छन् । नन्दप्रसाद शिवाकोटी स्मृति ग्रन्थ विमोचन कार्यक्रमलाई सम्बोधन गर्दै अझै राजनीतिक अस्थिरताले देश विकास हुन नसकेको बताए ।

उनले भने, ‘राजनीतिक अस्थिरता छ, अझै कति दिन यो व्यहोर्नपर्ने हो थाहा छैन । प्रधानमन्त्रीले यो मेरो संख्या होइन, जादु हो भनिराख्नुभएको छ । हामीलाई राम्रो प्रधानमन्त्री चाहिएको छ । उहाँ राम्रो जादूगर भएर आउनुभएको छ । अहिले हामी बिडम्बनामा बाचिराख्नुपरेको छ ।’

प्रधानमन्त्रीले शनिबार एक कार्यक्रममा बोल्दै माओवादीसँग जादुयी अंक भएकाले आफूहरुलाई प्रधानमन्त्रीबाट हटाउन सजिलो नभएको बताएका थिए । उनले तरिका मिले पुरै अवधि प्रधानमन्त्री हुने जिकिर गर्दै दिएको अभिव्यक्तिप्रति नेता लेखकले व्यंग्य गरेका हुन् ।