कान्तिपुर टेलिभिजनमा आफ्नो ‘चरित्रहत्या’ गरिएकोप्रति जसिताको आपत्ति, स्वस्तिमा-साम्राज्ञी र ओेसिनमाथि गम्भीर प्रश्न

काठमाडौं । कान्तिपुर टेलिभिजनमा प्रशारण हुने ‘इट्स माइ शो’ को पछिल्लो एपिसोड विवादमा परेको छ । नायिका जसिता गुरूङले कार्यक्रममा आफूलाई बदनाम गर्न खोजिएकोप्रति आपत्ति जनाएकी छन् ।

फेसबुकमा स्टाटस लेख्दै उनले नायिकाद्वय स्वस्तिमा खड्का, साम्राज्ञी आरएल शाह र कार्यक्रम प्रस्तोता ओसिन सिटौलामाथि गम्भीर प्रश्नहरू तेर्स्याएकी छन् ।

यस कार्यक्रमको तीन दिनअगाडि प्रशारित एपिसोडमा स्वस्तिमा र साम्राज्ञी गेस्टको रूपमा आएका थिए । कार्यक्रम प्रस्तोता ओेसिनले उनीहरूलाई केही आपत्तिजनक प्रश्न सोधेकी थिइन् । कार्यक्रममा अन्य कलाकारहरूको नितान्त व्यक्तिगत विषयहरूमा टिकाटिप्पणी भएका थिए ।

ओेसिनले साम्राज्ञीलाई नायक अनमोल केसीका दुई एक्स गर्लफ्रेन्डको नाम लिन भनेकी छिन् । जवाफ दिन नसके लुगा फुकाल्नुपर्ने ओेसिनको शर्त हुन्छ । स्वस्तिमाले सोचविचारबिनै दुई महिलाको नाम लिइदिन्छन् ।

स्मरणीय छ कि अहिलेसम्म अनमोलले कसैसित पनि आफ्नो प्रेम रहेको सार्वजनिक स्वीकारोक्ति गरेका छैनन् ।

स्वस्तिमालाई नै अर्को प्रश्न सोधिन्छ- पहिले धिरज मगरसँग डेट गरेकी र अहिले अनमोल केसीसँग डेट गरिरहेकी नायिका को हुन् ?

यसमा पनि स्वस्तिमाले निर्धक्कसँग भन्छिन् जसिता गुरूङ । त्यसपछि साम्राज्ञीले खित्खिताउँदै थप्छिन्- बीचमा प्रदीप खड्कासँग पनि हो ।

यसरी खुलेआम रूपमा उनीहरूले कार्यक्रममा उपस्थित नै नरहेका तेस्रो व्यक्तिहरूमाथि उनीहरूको निजी जीवनमा असर पर्नेगरी टिप्पणी गरेका थिए । यसमा पहिलो प्रतिक्रिया जसिताबाट आएको हो । अब कार्यक्रममा नाम लिइएका अरूले पनि मुख खोल्ने सम्भावना छ ।

जसिताले अंग्रेजीमा लेखेको स्टाटसको भावानुवाद:

मैले यस विषयमा बोल्नैपर्ने भयो । म यो कहिले बुझ्दिन कि किन मान्छेहरू राष्ट्रिय टेलिभिजनमा गएर कसैको व्यक्तिगत जीवनको बारेमा कुरा गर्छन् जब कि उनीहरूले त्यो व्यक्तिलाई राम्ररी चिनेका पनि छैनन् । यो अन्तर्वार्ता हेरिसकेपछि म साच्चिकै तिनै जनासँग दुःखी छु। के हामी साँच्चै एउटा महिलाले अर्को महिलालाई गिराउने दौडमा छौं रु व्यक्तिगत रुपमा मेरो तीमध्ये कसैसँग कुनै इस्यू छैन। सुरुदेखि नै, मैले उहाँहरूलाई राम्रो अभिनेत्री र होस्टको रूपमा उच्च सम्मान र प्रशंसा गरेको छु। के तपाइँहरुलाई थाहा छ कि तपाईहरु के बोल्दै हुनुहुन्छ र तपाईहरुको त्यो बोलीले कति जनाको जिन्दगीमा असर पर्छ ?

के तपाईंलाई थाहा छ मैले मेरो विगतमा के भोगेको छु ? के तपाईहरुलाई लाग्दैन कि तपाइँहरुले दिनुभएको अन्तर्वार्ता र समाचारहरु मेरो परिवारहरुले पनि हेर्नुहुन्छ भनेर? समाजमा महिलालाई हेर्ने कस्तो दृष्टिकोण बसाल्दै हुनुहुन्छ तपाईहरु ? कसैको व्यक्तिगत जीवनलाई सार्वजनिक रूपमा बदनाम र चर्चा गर्ने कारण के हो? ओसिन सिटौला, स्वस्तिमा खड्का, कान्तिपुर टिभी, र पक्कै पनि साम्राज्ञी (त्यसपछि उनले मलाई ब्लक गरिन्)।

याे पनि पढ्नुहाेस्

कान्तिपुर टिभीमा ओसिन सिटौलाको ‘गेम’ : प्रश्नको जवाफ दिन नसके नायिकाले नांगिनुपर्ने !