खल्तीको मान्छे राजदूत पठाउँदा भू-राजनीतिक रूपमा कमजोर हुँदैछौं : रास्वपा सांसद झा (भिडिओ)

काठमाडौं । राष्ट्रिय स्वतन्त्र पार्टीका सांसद मनिष झाले राजदूत नियुक्तिको प्रक्रिया सुधार गर्न माग गरेका छन् । प्रतिनिधिसभाको बैठकमा बोल्दै खल्तीको मान्छे पठाउँदा पद अस्वीकार गरेको विज्ञप्ति आउन थालेको बताए ।

उनले भने, ‘अहिले पनि हामी भूराजनीतिक रूपमा कमजोर कदम चाल्दैछौं । राजदूतहरू खल्तीबाट नाम निकालेर कसैको नाम पठाउँदा मेरो नाम किन पठाइदिएको ? म यो अस्वीकार गर्छु भनेर विज्ञप्ति आउन थाले । हामीले कमजोर रूपमा नियुक्ति प्रक्रियाको अभ्यास गर्दै गर्दा भूराजनीतिक रूपमा हामी कमजोर हुँदैछौं ।’

राजदूत देशको प्रतिनिधित्व हुने भएको उल्लेख गर्दै भने, सरकारले कमजोर प्रतिनिधि पठाउँदै गर्दा आफ्नो कमजोरीहरु पठाउँदैछ । त्यसैले यसलाई सुधारिएको अभ्यास गरियोस् ।

एमालेको कोटाबाट सरकारले दक्षिण कोरियाको लागि नेपाली राजदूतमा सिफारिस गरेको सुशील प्याकुरेलले पद अस्वीकार गरेपछि उनले राजदूत नियुक्ति प्रक्रियामा प्रश्न उठाएका हुन् ।