स्वस्तिमा र साम्राज्ञीले जसितासँग माफी मागे, विवादित अन्तरवार्ता भने कान्तिपुर टेलिभिजनमा यथावत्

काठमाडौं । नेपाली चलचित्रमा अलिकति बौद्धिकता भएकी नायिकाको रूपमा चिनिन्थिन् स्वस्तिमा खड्का । तर, हालै कान्तिपुर टेलिभिजनमा दिएको एउटा अन्तरवार्ताले उनको बौद्धिकतामाथि मात्र होइन, ‘कमन सेन्स’ माथि नै प्रश्न उठेको छ ।

ओसिन सिटौलाले चलाएको शोको पहिलो एपिसोडमा स्वस्तिमा र साम्राज्ञी राज्यलक्ष्मी शाह गेस्ट बनेर गएका थिए । कार्यक्रममा होस्टले सोधेको प्रश्नको जवाफ दिन नसकेमा ‘लुगा फुकाल्नुपर्ने’ जस्तो अपाच्य गेम खेलाइएको थियो । उक्त गेममा ओसिनले विभिन्न सेलिब्रिटीको नाम लिँदै फलानाको बेडमा कसलाई भेट्न सकिएला ? जस्ता अनर्गल प्रश्नहरू सोधेकी थिइन् ।

अर्को राउन्डमा भएको प्रश्न-उत्तर झनै उदेकलाग्दो थियो । ओसिनले प्रश्न सोध्ने र जसले छिटो बजर दबाउँछ उसले जवाफ दिनुपर्ने थियो ।

ओसितले प्रश्न सोधिन्, ‘पल शाहका कतिजना गर्लफ्रेन्डको नाम भन्न सक्नुहुन्छ ?’

स्वस्तिमाले हतारिँदै बजर दबाइन् । साम्राज्ञी भने आफूलाई थाहा नभएको भन्दै टक्टकिइन् ।

स्वस्तिमाले बजर दबाए पनि फ्याट्ट नाम लिन सकिनन् ।

उनले भनिन्, ‘म केटीहरू त थाहा छ, तर नाम थाहा भएन ।’

नाम भन्न नसकेपछि उनले प्वाइन्ट गुमाइन् ।

अर्को प्रश्न सोधियो, ‘अनमोल केसीको कतिजना गर्लफ्रेन्डहरूको नाम भन्न सक्नुहुन्छ ?’

यो पनि पढ्नुहोस् : कान्तिपुर टिभीमा ओसिन सिटौलाको ‘गेम’ : प्रश्नको जवाफ दिन नसके नायिकाले नांगिनुपर्ने !

स्मरणीय छ कि अहिलेसम्म नायक अनमोल केसीले आफ्नो कसैसँग प्रेम रहेको सार्वजनिकरूपमा स्वीकारेका छैनन् । कुनै मिडियाले ठोकुवा गरेर समाचार पनि लेखेका छैनन् । साम्राज्ञीले फेरि पनि आफूलाई थाहा नभएको भनेर पन्छिइन् । तर, स्वस्तिमाले फ्याट्टै बजर दबाइन् र भनिन्, ‘टु’ दुईजना ।

साम्राज्ञीले सोधिन्, ‘तिमीलाई साँच्चै थाहा छ ?’

स्वस्तिमाले आत्मविश्वासपूर्वक भनिन्- एस ।

ओसिनले नाम भन्न आग्रह गरिन् । केही सोचविचार नै नगरी स्वस्तिमाले जवाफ दिइन्, ‘आना शर्मा र अश्मी श्रेष्ठ’ ।

आना शर्मा भन्दा साम्राज्ञीको रेस्पोन्स थियो- ए… या.. या..।

अश्मीको नाम लिँदा भने साम्राज्ञी पनि आश्चर्यमा परेकी थिइन् ।

उनले सोधिन्, ‘उसको अश्मी दीदीसँग पनि थियो र ?’

त्यसपछि स्वस्तिमाले भनिन्, ‘आइ थिंक सो । आइ डन्ट नो । मैले यत्तिकै भनिदिएको हुँ ।’

यसैबाट पुष्टि हुन्छ कि उनले कति हचुवामा महिला कलाकारहरूलाई कसैसँग जोडेर नाम लिइरहेकी थिइन् ।

ओसिनले अर्को प्रश्न सोधिन्- कसले पहिले धिरज मगरलाई र अहिले अनमोल केसीलाई डेट गरिरहेको छ ?

स्वस्तिमा र साम्राज्ञी दुवैले उत्साहित हुँदै बजर दबाए । भन्ने पालो स्वस्तिमाले नै पाइन् ।

उनले यसमा पनि बेहिच्किचाहट रूपमा भनिदिइन्ः आइ थिंक इट्स जसिता गुरुङ ।

प्रश्न सच्याउँदै साम्राज्ञीले थपिन्ः प्रदीप, धिरज एन्ड अनमोल ।

यसरी जसितालाई एकसाथ तीनजना पुरुष कलाकारसँग नाम जोड्ने काम राष्ट्रिय टेलिभिजनको स्क्रिनबाट तीन महिलाहरूले गरे । जथाभावीरूपमा यसरी नाम जोड्दा सम्वन्धित कलाकारको निजी जीवनमा पर्ने असरबाट उनीहरूले पूरै नजरअन्दाज गरेका थिए । तेस्रो व्यक्तिको निजी जीवन र गोपनीयताको धज्जी उडाइरहेका थिए ।

यो कार्यक्रमलाई लिएर जसिताले सामाजिक सञ्जालमार्फत आपत्ति जनाएकी छन् । उनले फेसबुकमा एक स्टाटस लेख्दै आफ्नो बदनाम गर्न खोजिएको टिप्पणी गरेपछि स्वस्तिमा र साम्राज्ञीले माफी मागेका छन् ।

स्वस्तिमाले लेखेकी छन्, ‘म तिम्रो भावनामा चोट पुगेकोमा एकदमै दु:खी छु । यो एउटा रमाइलो शो थियो र यो एकदमै आवेगमा भयो । तिमी सँगै मेरो राम्रो साथी हौ र फेरि पनि म सबै कुराका लागि माफी चाहन्छु ।’

यो शोपछि साम्राज्ञीले उल्टै आफूलाई फेसबुकमा ब्लक गरेको जसिताले बताएकी छन् । इन्स्टामा भने साम्राज्ञीले पनि माफी मागेकी छन् ।

उनी लेख्छिन्, ‘हामीलाई एउटा र्‍यापिड राउन्डमा राखिएको थियो र हामीले यसको परिणामलाई विचार गरेनौं । तिमीलाई उपहास गर्ने हाम्रो उद्देश्य थिएन । म तिम्रो भावनामा चोट पुगेकोमा माफी चाहन्छु ।’

नायक अनमोल केसीले पनि जसिताको स्टाटसमा प्रतिक्रिया जनाएका छन् । उनले लेखेका छन्, सम्मानित तीनैजना महिलाहरुलाई म आग्रह गर्न चाहन्छु कि रिल क्यारेक्टरमा भन्दा रियल क्यारेक्टरमा फोकस गर्नुहोला ।

यो पनि पढ्नुहोस् : कान्तिपुर टेलिभिजनमा आफ्नो ‘चरित्रहत्या’ गरिएकोप्रति जसिताको आपत्ति, स्वस्तिमा-साम्राज्ञी र ओेसिनमाथि गम्भीर प्रश्न

यो सबैको सूत्रधार ओसिन सिटौलाले भने अहिलेसम्म माफी मागेकी छैनन् । न त टेलिभिजनले नै यो शो हटाएको छ । अहिले पनि जसिता लगायत कलाकारहरूको मानमर्दन गरिएका संवादहरू यथावत् हेर्न सकिन्छ । जसिताले शोमा आफ्नो प्रसंग हटाउनका लागि टेलिभिजन निर्माण पक्षलाई आग्रह गरिरहेको बुझिएको छ ।

यो शो पहिले सुरजसिंह ठकुरीले चलाउँथे । अहिले ओसिन आएकी हुन् । पहिलो एपिसोडबाटै उनले शोको प्रतिष्ठा धुलिसात बनाइदिएकी छन् । अंग्रेजी फलाकेपछि ठूलाे भइने र जसलाई जे-जे भन्दा पनि हुने हिनग्रन्थि उनमा देखियाे । ओसिनको यस्ताे वौद्धिक दरिद्रताले कार्यक्रमको भविष्यमाथि नै प्रश्न उठेको छ ।