बादल ओलीतिर लागेपछि सल्लाहकारले दिए राजीनामा

काठमाडौं । गृहमन्त्री रामबहादुर थापा बादलले नेकपा विभाजनमा प्रधानमन्त्री केपी शर्मा ओलीलाई साथ दिएपछि उनका राजनीतिक सल्लाहकार सूर्य सुवेदी पथिकले राजीनामा दिएका छन् ।

नेकपा केन्द्रीय सदस्य समेत रहेका सुवेदी तत्कालीन माओवादीका हरेक संघर्षमा बादलसँगै थिए । करीव तीन वर्षदेखि गृहमन्त्रीको सल्लाहकार रहेका सुवेदीले राजनीतिक लाइनमा बादलसँग सहमत नभएपछि राजीनामा दिएको बताइएको छ ।

सुवेदीले फेसबुक स्टाटस लेख्दै भनेका छन्– गृहमन्त्री आदरणीय कमरेड रामबहादुर थापा बादलको सचिवालय र उहाँको राजनीतिक सल्लाहकारको भूमिकामा आजबाट राजनीतिक र नैतिक दृष्टिले नरहेको जानकारी गराउछु ।

सुवेदी आजै प्रचण्ड माधव नेपाल पक्षको केन्दीय कमिटी बैठकमा सहभागी भएका छन् ।