रुपन्देहीमा निषेधाज्ञा गर्न डीसीएमसीको सिफारिस

रूपन्देही । कोरोना सक्रिय संक्रमित १४ सय पार गरेपछि रूपन्देहीमा वैशाख १६ गतेबाट निषेधाज्ञा लगाउन जिल्ला कोभिड-१९ संकट व्यवस्थापन केन्द्रले सिफारिस गरेको छ।

केन्द्रको बैठकले वैशाख १६-२९ गतेसम्म निषेधाज्ञा लगाउने गरी सिफारिस गर्ने निर्णय भएको सहायक प्रमुख जिल्ला अधिकारी विजय पौडेलले जानकारी दिए ।

‘१६ गते बिहान १ बजेदेखि वैशाख २९ गतेसम्म निषेधाज्ञा लगाउने सिफारिस गरिएको छ । यसको औपचारिक निर्णय भने बुधबार हुनेछ ‘, पौडेलले भने ।

उद्योगी व्यवसायी, स्थानीय तह, राजनीतिक दलहरुसँग चरणबद्ध रुपमा छलफल गरेर निष्कर्ष निकालेको उनले बताए ।

निषेधाज्ञा अवधिमा औषधी उपचार र अन्य अत्यावश्यक कामबाहेक घरबाहिर निस्कन नदिइने भएको छ । अति आवश्यक सवारीसाधनलाई मात्र सञ्चालन गर्न दिइने सिफारिस केन्द्रले गरेको छ ।