बूढानीलकण्ठ पुगेर प्रकाशमानले राखे सरकारमा जाने चाहना, गृहमन्त्रीबारे देउवाको यस्तो जवाफ

काठमाडौं । सरकारमा जाने तयारीमा रहेको नेपाली कांग्रेसभित्र शेरबहादुर देउवाबाहेक प्रायः सबै सांसद मन्त्रीका आकांक्षी छन् । यसपटक एमाले अध्यक्ष केपी शर्मा ओली प्रधानमन्त्री बन्ने सरकारको नेतृत्व गरेर जान सिनियर नेताहरूले सभापति देउवासँग भेटघाट गरिरहेका छन् ।

हालैमात्र दिल्लीमा उपचार गराएर फर्किएका कांग्रेसका पूर्वउपसभापति प्रकाशमान सिंहले बुधबार बिहान देउवालाई भेटेर आफ्नो स्वास्थ्य अवस्था र सरकारमा जाने चाहना खुलेरै व्यक्त गरेका छन् । पत्नी सिर्जना सिंहसहित गएका नेता सिंहले आरजु राणा देउवासँग पनि अलग्गै पारिवारिक वातावरणमा छलफल गरेका थिए ।

देउवासँग प्रकाशमान दम्पतीले करिब २० मिनेट बेग्लै भेट गरेका थिए । नेता सिंह यसपटक कांग्रेसबाट सरकारको नेतृत्व गरेर जान इच्छुक छन् । उनले १४ औं महाधिवेशनमा देउवालाई सभापति जिताउन गरेको त्यागको समेत स्मरण गराएको बताइन्छ ।

देउवालाई आफूलाई सभापतिमा सघाएकामध्ये कृष्ण सिटौलालाई राष्ट्रियसभामा ल्याएर अध्यक्ष बनाउन चाहेका थिए । तर, माओवादीले अन्तिममा गठबन्धन तोडेपछि सिटौला अध्यक्ष बन्न पाएनन् । तर देउवाले भने गुन तिरे ।

त्यस्तै सभापतिमा सघाएका रामचन्द्र पौडेललाई राष्ट्रपति बनाइसकेका देउवाले प्रकाशमान सिंह र शशांक कोइरालालाई पनि गुन तिर्ने आश्वासन दिएका थिए । यसपटक प्रकाशमानक सरकारमा जान जोडबल लगाइरहेका छन् भने सशांकको चाहना अझै प्रष्ट छैन । उनी देउवालाई आफूलाई सभापति नै बनाइदिने आशामा छन् ।

प्रकाशमानले कांग्रेसबाट सरकारको नेतृत्व गर्ने सम्भावनासँगै उनले पाउने मन्त्रालयबारे भने अहिलेसम्म छलफल नै भएको छैन । बुधबारै संघीय निजामती ऐनको बारेमा छलफल गर्न बूढानीलकण्ठ पुगेका कांग्रेसनिकट कर्मचारी युनियनका नेताहरूसँग देउवाले गृहमन्त्रालय कांग्रेसले नै पाउने भन्ने सहमति भइनसकेको बताएका छन् । कतै शीर्ष तहमा प्रधानमन्त्री हुने दलले नै गृह र अर्थमन्त्रालय राख्ने समझदारी भएको हो कि भन्ने आशंकासमेत जन्मिएको छ ।

यसअघि अर्थ एमाले र गृह कांग्रेसले पाउने सहमति भएको भनेर चर्चा भए पनि देउवाले कांग्रेसले गृह पाउने निश्चित नभएको बताएका हुन् । गृह कांग्रेसले नै पाए पनि रमेश लेखक त्यसको प्रमुख दाबेदार मानिएका छन् । त्यस्तो अवस्थामा प्रकाशमान रक्षामन्त्री भएर सरकारमा जाने सम्भावना पनि छ ।

दिल्लीबाट फर्किएपछि कांग्रेसका अधिकांश नेताहरुले चाक्सीबारीमै पुगेर प्रकाशमानको स्वास्थ्यलाभको कामना गरेका छन् । सोही क्रममा देउवा दम्पत्तिको चासो भएकाले भेटेर सन्चो बिसन्चोको कुरा हुने क्रममा सरकार कसरी बन्दैछ र कांग्रेसबाट को जाने भन्नेबार अनौपचारिक कुराकानीमात्र भएको सिंहनिकट स्रोतले जनाएको छ ।