प्रचण्डको गुनासो- फोटो देखाउँदा पनि ओलीले होइन भन्नुभयो, कतिसम्म ढाँटेको ? (भिडिओ)

काठमाडौं । प्रधानमन्त्री पुष्पकमल दाहाल प्रचण्डले आफूलाई एमाले अध्यक्ष केपी शर्मा ओलीले नराम्ररी ढाँटेको गुनासो गरेका छन् । आज संसदमा बोल्दै उनले कांग्रेससँग सहमति गरिसकेपछि पनि ओलीले आफूलाई होइन भनेर ढाँटेको बताए ।

कांग्रेस र एमालेबीच सहमति भएको भोलीपल्ट एमाले अध्यक्ष ओली प्रधानमन्त्री भेट्न बालुवाटार पुगेका थिए । उनीहरुबीच ३ घण्टा लामो कुराकानी भएको थियो ।

प्रधानमन्त्रीका अनुसार उक्त भेटमा ओलीले कांग्रेससँग कुनै पनि सहमति नभएको बताएका हुन् ।

आफूले फोटो देखाउँदा पनि ओलीले अस्वीकार गरेको प्रचण्डले बताए । उनले यसो भन्दा सदनमा हाँसो गुञ्जिएको थियो । ओली पनि मुसुमुसु हाँसे ।

प्रधानमन्त्रीको भनाइ:

दुई दलको बीचमा सहमति भइसक्यो, हस्ताक्षर भइसक्यो, त्यो सबै कथा अहिले भन्न चाहन्न । १७ गते राति भइसकेपछि १८ गते बिहान आएर एमालेका अध्यक्षले भएकै छैन भन्नुभो । म कान्तिपुर देखाउँछु, फोटो आइसक्या छ, शेरबहादुरजी र तपाईँले गरेको ।

के कुरा गर्‍या तपाईँले ? यो कहिलेको फोटो रहेछ भन्नुभयो उहाँले । ढाँटछलको पनि एउटा सीमा हुन्छ नि ।

शेरबहादुरजीलाई फोन गरेर ‘तीन पार्टी बस्ने हो, अनि मात्र के गर्ने’ भन्नुहुन्छ । देउवालाई मैले फोन गर्दा तत्काल लागेन । एक छिनपछि लाग्यो । के हो एमाले अध्यक्षले त सहमति भएको छैन, तीन नेता बसेर टुंग्याउयने भन्नुहुन्छ भनेँ ।

सभापतिले भन्नुभयो– सहमति भइसक्यो, हस्ताक्षर भइसक्यो, म ढाँट्न जान्दिन । सरी । तीन्टा बसेर के गर्ने भइसक्यो, भइसक्यो भन्नुभयो (क्यारिकेचर गर्दै) आफ्नै शैलीमा । यस्तो शैली अपनाउनुपर्छ दुईजटा ठूला दलहरूले ? नियत सफा भए दिनकै उज्यालोमा पनि गर्न सकिन्थ्यो ।