आफ्नो कार्यकालमा अर्थतन्त्रमा व्यापक सुधार भएको प्रधानमन्त्रीको दाबी (भिडिओ)

काठमाडौं । प्रधानमन्त्रीको पुष्पकमल दाहाल प्रचण्डले आफ्नो कार्यकालमा अर्थतन्त्रमा व्यापक सुधार भएको दाबी गरेका छन् । शुक्रबार संसदमा बोल्दै प्रधानमन्त्री प्रचण्डले गत वर्ष १.९५ प्रतिशत रहेको आर्थिक वृद्धिदर यस वर्ष ३.८७ प्रतिशत पुगेको जिकिर गरे ।

प्रधानमन्त्री प्रचण्डको भनाइ

मैले सरकारको नेतृत्व लिने वेला देशको अर्थतन्त्रको अवस्था के थियो ? सबैलाइ राम्रोसँग जानकारी छ । आर्थिक सङ्कटले निम्त्याएको चरम निराशाको बेला ७.४ प्रतिशतको मुद्रा स्फीति र न्यून विदेशी मुद्राको सञ्चितीले अत्यन्त चापमा परेको बाह्य क्षेत्रको सन्तुलन, घट्दो राजस्व र बढ्दो सार्वजनिक ऋणले आर्थिक रूपले धराशायी हुने अवस्था थियो । अर्थतन्त्रका विभिन्न क्षेत्रमा दबाब थियो, तर वित्तीय तथा मौद्रिक नीति पूर्ण कार्यान्वयन, निजी क्षेत्रसँग गरिएका अन्तरक्रिया निरन्तर संवाद र प्रयासले परिणाम दिन सुरु गर्‍यो । अर्थतन्त्रमा देखापरेको सङ्कुचन, उच्च ब्याजदर, विदेशी मुद्राको सञ्चितीमा परेको चाप पुँजी बजारमा आएको गिरावट र निजी क्षेत्रमा आएका समस्यालाई उचित सम्बोधन गरिएकाले आर्थिक सूचकहरू क्रमशः सबल हुँदै गए ।

गत वर्ष आर्थिक वृद्धिदर १.९५ प्रतिशत थियो भने यो वर्ष त्यसको दोब्बर ३.८७ प्रतिशत र आगामी आर्थिक वर्षमा ६ प्रतिशतको लक्ष्य छ । यो लक्ष्य केबल प्रचारको लागि गरिएको होइन । यसका साथै गत वर्ष ऋणात्मक रहेको राजस्वको वृद्धिदरमा १० प्रतिशतले वृद्धि भएको छ । ६ अर्बको लगानी प्रतिबद्धतासहित तेस्रो लगानी सम्मेलन सम्पन्न भएको छ । ८८ घण्टा लाग्ने श्रम स्वकृति अहिले १ घण्टामा नै हुने भएको छ । विदेशी रोजगारीमा जानेलाई सहुलियतपूर्ण ऋण दिने प्रक्रिया सुरु भएको छ । वैदेशिक रोजगारीमा जाने नेपालीको सङ्ख्या ७.१ प्रतिशतले घटेको छ । रेमिट्यास वृद्धि भइरहेको छ । सुनकोशी मरिन डाइभर्सन र नागढुंगा नौबीसे सुरुङ मार्गको ब्रेक थ्रु भएको छ ।