कांग्रेस-एमाले नेता शीतल निवासमा, ओलीलाई आजै प्रधानमन्त्री नियुक्त गर्ने तयारी

काठमाडौं । नेपाली कांग्रेस र नेकपा एमालेले दाबी पेश गरेपछि राष्ट्रपतिबाट आजै राति एमाले अध्यक्ष केपी शर्मा ओलीलाई प्रधानमन्त्री नियुक्त गर्ने सम्भावना रहेको नेताहरुले बताएका छन् ।

ओलीसहित दुवै दलका नेताहरु शीतल निवास पुगिसकेका छन् ।

राष्ट्रपतिले आइतबार साँझ ५ बजेभित्र दाबी पेश गर्न भनेकोमा आजै दावी पेश गरिएको हो ।

प्राकृतिक विपत्तिका बेला सरकार कामचलाउ राख्न नहुने भन्दै आजै राति प्रधानमन्त्री नियुक्त गर्न दुवै दलका नेताहरुको सुझाव छ । राष्ट्रपति कार्यालय स्रोतले भने आजै नियुक्तिको बारेमा अहिलेसम्म केही जानकारी नभएको जनाएको छ ।

पहिले औपचारिकरुपमा दाबी पेश भएपछि राष्ट्रपतिले आवश्यक कदम चाल्ने शीतल निवास स्रोतको भनाइ छ । कांग्रेस र एमालेका नेताहरु आजै प्रधानमन्त्री नियुक्ति हुनेगरी शीतल निवास पुगेका छन् भने प्रधानमन्त्रीको कारगेड पनि शीतल निवासमा पुगिसकेको छ ।