फाइनल अघि डी मारियाको बिदाइ, मेस्सीसँग अंगालोमा हुँदा भावुक

हेटौंडा । अर्जेन्टिनालाई विश्वकप फुटबलको उपाधि जिताउन महत्वपूर्ण भूमिका निर्वाह गरेका अर्जेन्टिना राष्ट्रिय टोलीले स्टार मिडफिल्डर एन्जेल डी मारियालाई बिदाइ गरिएको छ ।

सोमबार बिहान हुने कोपा अमेरिकाको फाइनल अघि उनको बिदाइ गरिएको हो । कोपाको फाइनलनै आफ्नो अन्तर्राष्ट्रिय खेल जीवनको अन्तिम खेल हुने भन्दै सन्न्यास लिएका मारियालाई डिनरसहित बिदाइ गरिएको हो ।

३६ वर्षीय मिडफिल्डर डि मारियालाई बिदाइको क्रममा अर्जेन्टिनाका कप्तान मेस्सीले बिदाइ जर्सी प्रदान गरेका थिए । उनिहरु एक अर्काको अंगालोमा कसिएर रोएका थिए । उक्त समय माहोल निकै भावुक बनेको अन्तर्राष्ट्रिय खेल मिडियाले जनाएको छ ।

सन् २००८ मा अर्जेन्टिनी टोलीमा डेब्यु गरेका मारियाले १४४ खेलमा ३१ गोल गरेका छन् । बिदाइको क्रममा मारियाले अर्जेन्टिनालाई कोपा २०२४ को उपाधि दिलाएर सुखद अन्त्य गर्ने चाहाना भएको बताए । राष्ट्रिय टोलीबाट खेल्दा निकै आनन्द र गौरवको अनुभुति हुने गरेको उनले प्रतिक्रिया दिएका छन् ।