लुम्बिनीमा ७ वर्षपछि प्रतिपक्षमा धकेलिँदै माओवादी, प्रदेश प्रमुख पनि गुमाउँदै

रुपन्देही । प्रदेश सरकारको स्थापनादेखि नै निरन्तर लुम्बिनीको सत्तामा रहेको नेकपा माओवादी केन्द्र सत्ता समीकरण फेरिएसँगै प्रतिपक्षमा धकेलिने भएको छ । ७८ सालमा तत्कालीन मुख्यमन्त्री शंकर पोखरेलको नेतृत्वमा केही महिनाबाहेक ७४ सालयता माओवादी निरन्तर सत्तामा छ ।

संघीय सरकारमा आफ्नो दलको नेतृत्व नभएपपछि प्रदेश प्रमुख अमिक शेरचन पनि राजीनामा दिने तयारीमा छन् ।

प्रदेशसभाको दुवै कार्यकालमा सभामुख लिएको माओवादीबाटै प्रदेश प्रमुख पनि छन् । २ पटक मुख्यमन्त्री पनि पाइसकेको छ । ८७ सदस्य प्रदेशसभामा माओवादीबाट अघिल्लो कार्यकालमा १८ र अहिलेको कार्यकालमा समानुपातिकसहित १० सांसद छन् ।

पछिल्लोपटक असार २० गतेयता माओवादी सरकार अल्पमतमा रहेको छ । आइतबार दिउँसो १ बजे मुख्यमन्त्री जोखबहादुर महराले विश्वासको मत लिने गरी बैठक बोलाइएको छ । तर, त्यो भन्दा अगाडि नै उनले राजीनामा दिने तयारी गरेको निकट स्रोतले बतायो । ५ दलका ४८ सांसदले समर्थन दिएकोमा अहिले उनीसँग ११ सांसदमात्र साथमा छन् ।

महरा चैत २३ गते एमालेका २९, माओवादीका १०, नाउपाका ४, जसपाका ३, नेकपा एसका १ र स्वतन्त्र सांसद खड्ग बस्नेतसमेत ४८ सांसदको समर्थनमा मुख्यमन्त्री बनेका थिए ।

केन्द्रमा कांग्रेस-एमाले समीकरण बनेपछि एमालेका ५ जना मन्त्रीले असार २० गते राजीनामा दिएर समर्थन फिर्ता लिएका थिए । यहाँ ४४ जना भए बहुमत पुग्छ । एमालेका २९ र कांग्रेसका २७ जना जोड्दा आरामले बहुमत पुग्छ ।

एमाले संसदीय दल प्रमुख सचेतक तुलसीप्रसाद चौधरीले कांग्रेस र एमाले संसदीय दलको संयुक्त बैठक बसेर सांसदहरूलाई अनिवार्य उपस्थित हुन र मुख्यमन्त्री महराको विपक्षमा मतदान गर्न ह्वीप जारी गरिएको बताए । कांग्रेस संसदीय दलका प्रमुख डिल्लीबहादुर चौधरीले एमालेसँग बैठक बसेर थप योजना बनाइने बताए ।

एमाले र कांग्रेसले आइतबार नै बहुमत सांसदको हस्ताक्षर प्रदेश प्रमुखलाई बुझाउने तयारी गरेका छन् ।