लुम्बिनीमा पनि मुख्यमन्त्री महराले दिए राजीनामा

रुपन्देही । लुम्बिनी प्रदेशका मुख्यमन्त्री जोखबहाखुर महराले राजीनामाको घोषणा गरेका छन् । विश्वासको मतका लागि डाकिएको बैठकमा उनले राजीनामाको घोषणा गरेका हुन् । अल्पमतमा रहेका मुख्यमन्त्री जोखबहादुर महराले विश्वासको मत लिनका लागि यो बैठक आह्वान गरिएपनि उनी त्यो प्रक्रियामा गएनन् ।

सदनमा सम्बोधन गर्दै उनले केन्द्रमा समीकरण फेरिएपछि प्रदेशमा हुने यो खालको फेरबदलले अस्थिरता बढाएको जिकिर गरे ।

सरकारबाट हटेपनि एमालेले कुनै आरोप नलगाएको उनको भनाइ थियो ।

‘विश्वासको मत फिर्ता पनि यो संकेत आएको थियो उहाँहरुबाट । प्रदेशमा केन्द्रमा जे हुन्छ, त्यो हुन्छ भन्दै आएको छौं’ उनले भने ।

‘काठमाडौंमा पानी पर्दा देउखुरीमा छाता ओढेर संघीयता कमजोर बनायौं कि, मेरो पार्टीमा प्रदेशहरुलाई राजनीति गर्न पाउने अवस्था बनाउन आग्रह गरिरहेको र अन्य दलले पनि त्यो गर्नुपर्छ, हामी यहाँ अनावश्यक रुपमा छलफल गर्नुपर्ने विषय नै नभएको ठान्छु’, उनले भने ।

मुख्यमन्त्री महराले प्रदेशलाई संघबाटै अलपत्र पारिएको बताए ।

‘यहाँ छलफल नै गर्न नपाउने ? को मुख्यमन्त्री बन्ने ? मन्त्री को बन्ने ? भन्ने विषयमा प्रदेशलाई कुनै अधिकारै छैन, यसको विरुद्ध आफ्नो पार्टीमा गम्भीर बहस गरौं भन्ने मेरो सुझाव हो । यहाँ हामी दोषी छैनौ, यो यहाँको कारणले फेरबदल भएको होइन भन्ने लागेको छ’, महराले भने ।