पाकिस्तानलाई हराएमा नेपाल एक खेल अगावै पुग्नेछ सेमिफाइनल

काठमाडौं । श्रीलंकामा जारी नवौँ संस्करणको एसिया कप टी–२० महिला क्रिकेटमा नेपालले आज पाकिस्तानसँग खेल्दै छ ।

नेपाल र पाकिस्तानबीचको खेल श्रीलंकाको रंगिरी डम्बुला अन्तर्राष्ट्रिय क्रिकेट मैदानमा नेपाली समयअनुसार साँझ सवा ७ बजेदेखि सुरु हुनेछ ।

पहिलो खेलमा युएईविरुद्ध ऐतिहासिक जित निकालेको नेपालले पाकिस्तानलाई हराउँदै सेमिफाइनलमा यात्रा तय गर्न चाहन्छ । पाकिस्तान भने नेपाललाई हराउँदै सेमिफाइनलमा सम्भावना कायमै राख्ने दाउमा छ ।

पहिलो खेलमा नेपालले युएईलाई ६ विकेटले पराजित गर्दा पाकिस्तान भारतसँग ७ विकेटले पराजित भएको थियो । भर्खरै सकिएको खेलमा भारतले युएईलाई ७८ रनले पराजित गरेको छ ।

दुई खेल खेलेको भारत ४ अंकसहित शीर्ष स्थानमा छ । एक खेल खेलेको नेपाल २ अंकसहित दोस्रो र अंकविहीन पाकिस्तान तेस्रो स्थानमा छ ।

दुवै खेल गुमाएको युएई अंकतालिकाको पुछारमा छ । पाकिस्तानलाई हराएमा नेपाल एक खेल अगावै सेमिफाइनलको यात्रा तय गर्नेछ ।

यो खेलमा पाकिस्तान विजयी भएमा भने अन्तिम चरणका खेलले सेमिफाइनल खेल्ने टोलीको टुंगो लाग्नेछ ।