मिस युनिभर्स साओ पाउलो २०२४ को निर्णायक मण्डलमा मिस युनिभर्स नेपालको टिम

काठमाडौं । मिस युनिभर्स साओ पाउलोको निर्णायक मण्डलमा मिस युनिभर्स नेपालको टिम सहभागि हुने भएको छ । मिस युनिभर्स नेपाल २०२४ को नेसनल डिरेक्टर संगीता पुरी र ग्लोबल ग्ल्यामर भेन्चरको सिइओ एवम प्रेसिडेन्ट सबी पुरी मिस युनिभर्स साओ पाउलो २०२४को फिनालेमा निर्णायकको रूपमा नेपालको प्रतिनिधित्व गर्ने जानकारी आयोजक ग्लोबल ग्ल्यामर भेन्चरले जनाएको छ । मिस युनिभर्स साओ पाउलो २०२४को प्रिलिमनरी २२ जुलाईमा छ भने ग्रान्ड फिनाले २४जुलाईमा ब्राजिलको साओ पाउलोमा हुँदैछ ।

मिस युनिभर्स साओ पाउलो एक प्रतिष्ठित ग्लोबल प्रतियोगिता हो जसले विविधता र सशक्तिकरणका साथ विश्वभरका महिलाहरूको प्रतिभा र उपलब्धिहरू प्रदर्शन गर्दछ ।

मिस युनिभर्स नेपालको टिमको यस प्रतिनिधित्वले अन्तर्राष्ट्रिय प्रतियोगिताहरूमा भाग लिने नेपालको प्रतिबद्धतालाई मात्र नभई एक निर्णायकको रूपमा उत्कृष्टताको पहिचान गर्न र प्रतियोगीहरू बीच एकताको भावनालाई बढावा दिन महत्त्वपूर्ण भूमिका रहनेछ ।

यसबारे बोल्दै मिस युनिभर्स नेपालको नेसनल डिरेक्टर सङ्गिता पुरीले भनिन्, ‘मिस युनिभर्स साओ पाउलो २०२४मा नेपालको प्रतिनिधित्व गर्न पाउँदा मैले अत्यन्तै गौरवान्वित महसुस गरेकी छु । यस्तो प्रतिष्ठित कार्यक्रममा योगदान गर्न पाउनु र विश्वभरका महिलाहरूले देखाएको अतुलनीय प्रतिभाको साक्षी बन्न पाउनु एउटा सौभाग्यको कुरा हो। मैले यो कार्यक्रमबाट धेरै कुरा सिक्ने छु र मिस युनिभर्स नेपाल २०२४ मा मैले सिकेका सबै कुरा लागु गर्न उत्साहित छु ।’

ग्लोबल ग्ल्यामर भेन्चर मिस नेपाल युनिभर्स २०२४ को आयोजक हो । यस वर्षको मिस युनिभर्स नेपाल २०२४ को आवेदन छनोट प्रक्रिया शुरु भइसकेको छ भने ग्रान्ड फिनाले भाद्रको दोश्रो हप्तातिर हुने भएको छ ।

अडिसनमा नेपाली र एनआरएनको उत्साहजनक सहभागिता रहेको आयोजक ग्लोबल ग्लामर भेन्चरले बताएको छ । कार्यक्रमको आयोजक ग्लोबल ग्ल्यामर भेन्चरले यस वर्ष ट्रान्सजेन्डर, विवाहित, गैरआवासीय महिलाहरू र डाक्टर, इन्जिनियर, पाइलट लगायत विभिन्न पृष्ठभूमिका व्यक्तिहरूको उत्साहजनक र समावेशी सहभागिता भएको जनाएको छ । प्रारम्भिक चरणको आवेदन छनोट प्रकृयामा ६० जनालाई फिजिकल अडिसनको लागि शर्टलिस्ट गरिएको र त्यसबाट ३५ जनालाई प्रशिक्षण दिइने आयोजकले जनाएको छ ।