संसदमा सुदन किराँती- प्रतिपक्षी सानो छ भनेर हेप्ने ? (भिडिओ)

काठमाडौं । नेकपा माओवादी केन्द्रका सांसद एवं पूर्वमन्त्री सुदन किराँतीले सदनमा प्रतिपक्षी सानो छ भनेर हेप्न खोजिएको जिकिर गरेका छन् ।

प्रतिनिधिसभाको आजको बैठकमा विशेष समयमा बोल्दै किराँतीले संख्याका हिसाबले प्रतिपक्षीलाई हेप्न खोजिएको बताएका हुन् । लोकतन्त्रमा आकारले नभई मुद्दाले स्थान लिने उनले टिप्पणी गरे ।

‘दुई ठूला दल गठबन्धन गरेर सरकार बन्यो । सरकारले समावेशी सिद्धान्तको धज्जी उडाएको छ । काँसी जान्छु भनेर कुत्तीको बाटो लागेको छ’, उनको आरोप थियो ।

विभिन्न प्रकरणमा मुछिएकाहरूलाई मन्त्री बनाएर पुरस्कृत गरिएको र सुशासनको मुद्दामा प्रधानमन्त्रीले सदनमा बोलेको कुराले जगलाई मुर्ख बनाउने काम गरेको उनको जिकिर छ ।

‘मौद्रिक नीति रोक्ने काम भएको, विद्युत लाइन जोड्ने विषयमा अनुचित निर्देशन दिने काम भएको छ’, किराँतीले भने ।

अघिल्लो सरकारले अघि बढाएको छानबिन प्रक्रियाले निरन्तरता पाउँछ वा पाउँदैन भन्दै उनले प्रश्नसमेत गरे ।