कोभिड महामारीपछि पहिलो पटक अमेरिकाका सात शहरमा गुँजिदै नेपथ्य

काठमाडौं । नेपालको अग्रणी सांगीतिक समूह नेपथ्यले आगामी महिना अमेरिकामा श्रृंखलाबद्ध सांगीतिक यात्रा गर्ने भएको छ । नेपथ्य छैटौं पटक आफ्ना गीत सुनाउन अमेरिका जाने भएको हो।

ब्याण्डले आफ्नो यात्राका क्रममा अमेरिकाको पूर्वदेखि पश्चिम किनारासम्म सात वटा फरक फरक शहरका सांगीतिक प्रस्तुति दिने नेपथ्यको व्यवस्थापक नेपालयका अर्पण शर्माले जानकारी दिए ।

उनका अनुसार अमेरिकामा रहेका नेपाली भाषीहरुलाई लक्षित सङ्गीत यात्राअन्तर्गत नेपथ्य आगामी साता अमेरिका प्रस्थान गर्ने कार्यक्रम छ । नेपथ्यको यसपालाको अमेरिका यात्राको संयोजन ‘डीजे मोमो इन्टरटेनमेन्ट’ले गरिरहेको छ ।

नेपालयका अनुसार नेपथ्यले अगस्त ३ तारिखका दिन उल्लेख्य संख्यामा नेपालीहरुको बसोबास रहेको कोलोराडोको राजधानी डेनभरमा पहिलो सांगीतिक कार्यक्रम गर्नेछ । डेनभरको ‘बोल्डर थिएटर’मा नेपथ्यले यस वर्षको अमेरिका यात्राकै पहिलो कोसेली प्रस्तुत गर्नेछ । यहाँ नेपथ्यले पहिलो पटक सांगीतिक पाइला टेक्न लागेको शर्माले बताए ।

दोस्रो प्रस्तुति सान फ्रान्सिस्कोस्थित ‘वारफिल्ड थिएटर’मा अगस्त १० तारिखका दिन आयोजना हुनेछ । यसै हलमा ८ वर्षअघि नेपथ्यले आफ्नो सांगीतिक प्रस्तुति दिइसकेको छ ।

ओहायो राज्यको राजधानी कोलम्बसस्थित ‘केम्बा लाइभ कन्सर्ट भेन्यू’मा नेपथ्यले अगस्त १७ तारिखका दिन तेस्रो सांगीतिक प्रस्तुति दिनेछ । यहाँ पनि नेपथ्यले पहिलो पटक आफ्नो सांगीतिक प्रस्तुति दिन लागेको हो ।

चौथो कन्सर्ट टेक्सास राज्यमा रहेको छ। ‘नेपथ्यले ६ वर्षपछि प्रस्तुति दिएको डालासको ‘टोयोटा म्युजिक फ्याक्ट्री’मा अगस्त २४ तारिखमा आफुलाई उभ्याउनेछ’, नेपालयका शर्माले भने, ‘त्यसपछि ब्याण्ड अमेरिकामा सबैभन्दा बढी प्रस्तुति दिएको शहर न्युयोर्कमा पुग्नेछ । अघिल्लो पटक जस्तै न्यूयोर्कको म्यानहटनमै प्रस्तुत हुने नेपथ्यले यस वर्ष ‘टर्मिनल फाइभ’मा आफ्ना लोकरक धुनहरु पस्कनेछ । त्यहाँ अगस्त ३० तारिखमा नेपथ्य साँझ आयोजना हुनेछ ।’

उनका अनुसार न्यूयोर्कपछि नेपथ्य सेप्टेम्बर १ मा मेरिल्याण्ड राज्य पुग्नेछ । ब्याण्डले त्यहाँ लाइभ क्यासिनो होटल मेरिल्याण्डस्थित द हल एट लाइभ मा सांगीतिक प्रस्तुति दिनेछ ।

नेपथ्यको अन्तिम कन्सर्ट पेन्सिलभानियाको ह्यारिसबर्ग शहर हुने शर्माले बताए । यो शहरमा पनि नेपथ्यले पहिलो पटक सांगीतिक प्रस्तुति दिन लागेको छ । यस शहरको ‘द फोरम अडिटोरियम’ मा सेप्टेम्बर ७ का दिन कन्र्सट आयोजना हुनेछ । करिब १०० वर्षअघि सिम्फोनी अर्केष्ट्रा प्रस्तुत गर्ने उद्देश्यले यो हल तयार पारिएको थियो ।

नेपथ्यले सन् २००४ मा फिनिक्स र वासिङटन डीसीमा पहिलो पटक अमेरिका यात्रा गरेको थियो । त्यसपछिका वर्षहरुमा ब्याण्डले न्यूयोर्क, सानफ्रान्सिस्को, लस एन्जलस, एटलान्टा, डालास र बोस्टनमा सांगीतिक प्रस्तुति दिइसकेको छ ।

गत वर्षमात्रै क्यानाडामा श्रृंखलाबद्ध सांगीतिक यात्रा गरेको नेपथ्यले अमेरिकामा कोभिड महामारीपछि पहिलो यात्रा गर्न लागेको हो ।

अमेरिकाका सबै कन्सर्टमा दर्शकहरुले अनलाइनबाटै सोझै टिकट काट्न सकिने प्रवन्ध मिलाइएको नेपथ्यको व्यवस्थापक नेपालयका शर्माले बताए । उनका अनुसार नेपथ्यको अधिकारिक वेबसाइटमार्फत टिकट सुरक्षित गर्न सकिनेछ ।