माओवादीमा पदाधिकारी र स्थायी कमिटी भंग गर्नेबारे छलफल, पार्टीभित्र दबाबमा प्रचण्ड

काठमाडौं । नेकपा माओवादी केन्द्रको पदाधिकारी बैठकमा उपमहासचिव हरिबोल गजुरेलले प्रस्ताव राखे, ‘पार्टी पदाधिकारी सबैले अध्यक्षलाई राजीनामा बुझाऔं। ’

गत शुक्रबारदेखि पाँच दिनसम्म चलेको बैठकमा अध्यक्ष पुष्पकमल दाहाल प्रचण्डसहित पार्टी नेतृत्वसँग असहमति जनाउँदै लिखित रूपमै राजीनामासहितको प्रस्ताव अघि सारेका थिए।

उनको भनाइको सार थियो, ‘अहिले पार्टीलाई अवसर प्राप्त भएको छ। अब विधिअनुसार पार्टी चलाऔं, जनतामा जाऔं। पदाधिकारी हाम्रो विधानमा १५ जना मात्रै भनिएको छ। हामी २२ जना छौं त्यसैले सामूहिक राजीनामा दिएर नयाँ ढंगले अघि बढौं।’

उनले अरुले पद त्याग्न तयार नभएपनि आफू उपमहासचिव छाड्न तयार रहेको बैठकमा लिखित असहमतिपत्र राख्दै भनेका थिए। कांग्रेस र एमाले मिलेर सत्ताबाट प्रतिपक्षमा पुगेको माओवादीका अध्यक्ष प्रचण्डले यो पटक लामै बैठक राखेर नेताहरुको कुरा सुने।

प्रचण्डमाथि पछिल्लो समय सत्ताकेन्द्रित भएको आरोप पार्टीभित्रबाटै पनि लाग्ने गरेको छ। बैठकमा अध्यक्ष प्रचण्डको पनि नेताहरुले चर्को आलोचना गरेका थिए, जुन स्वभाविक थियो पनि।

लामो समयदेखि एकलौटी नेतृत्वमा रहेका प्रचण्डको विकल्पमा जानुपर्ने विषयमा पनि माओवादीमा बहस सुरु भएको छ। यद्यपी, तत्काल प्रचण्डको विकल्प खोज्नेगरी पार्टीमा छलफल नभएको प्रवक्ता अग्नि सापकोटको जिकिर छ।

माओवादीले थप छलफलको लागि स्थायी कमिटीको बैठक साउन २५ गतेका लागि बोलाएको छ। त्यसलगत्तै केन्द्रीय कमिटी बैठक बस्ने तयारी छ। माओवादीमा अहिले पदाधिकारी र स्थायी कमिटीलाई भंग गरेर महाधिवेशनमा जानुपर्ने विषयमा छलफल सुरु भएको छ। गत महाधिवेशनमा अध्यक्ष प्रचण्डले खल्तीबाट नाम अघि सारेकाले नेताहरु सन्तुष्ट छैनन्।

महासचिवमा वर्षमान पुन र जनार्दन शर्माबीच टकराब बढ्दा देव गुरुङलाई ल्याएका थिए। गुरुङमाथि अध्यक्ष प्रचण्ड र वरिष्ठ उपाध्यक्ष नारायणकाजी श्रेष्ठ सरकारमा हुँदा पार्टी चलाउन नसकेको आरोप छ।

विशेष महाधिवेशनको चर्चा चलिरहेको बेलामा पदाधिकारी र स्थायी कमिटी भंग गरेर नयाँ ढंगले पार्टीमा प्रस्ताव आएको छलफल चलिरहेको एक पदाधिकारीले बताए।

ती पदाधिकारीले भने, ‘बैठकमा हरिबोलजीले यो प्रस्ताव पनि राख्नुभएको हो। अहिले अध्यक्षले सबैको कुरा सुनेपछि मात्रै निर्णयमा जाने भन्नुभएको छ। यो विषयमा पनि छलफल चलिरहेको छ। अहिले निर्णय नै भएको छैन।’

बैठकमा अधिकांशले नेताहरुले विधान र विधि अनुसार पार्टी चलाउनुपर्छ भनेर अध्यक्षलाई दबाब दिइरहेको ती नेताले बताए।
ती नेताले थपे, ‘पहिला अध्यक्षज्यूले आकांक्षी धेरै भएकाले पदाधिकारी संख्या २२ पुर्याउनुभएको थियो। विधानले त १५ जनाभन्दा बढी संख्या चिन्दैन। त्यसैले यो प्रस्तावमाथि छलफल चलिरहेको छ। अब स्थायी कमिटीमा पनि सबैको कुरा सुन्ने भनिएको छ। त्यहाँ बहुमतले यो कुरालाई स्वीकारे निर्णय हुनसक्छ।’

माओवादी केन्द्रका सचिव चक्रपाणि खनालले पनि बैठकमा नेताहरुको कार्यशैलीको बिषयमा कुरा उठेको बताए।
उनले भने, ‘कार्यशैलीको विषयमा कुरा नउठेको होइन, उठ्यो। सरकार सञ्चालन, नियुक्तिको विषयमा छलफल गरेर प्राथमिकता कहाँ थियो त्यसमा जोड पुगेन भन्ने विषयमा कुरा उठेका छन्, तर व्यक्ति नै तोकेर कसैको बारेमा उठेन। नीतिको विषयमा कुरा उठेका हुन्।’