गुरुदेव कामतको निधनमा मधेश सरकारले आइतबार राष्ट्रिय झण्डा आधा झुकाउने

जनकपुरधाम । मधेश प्रदेश सरकारले प्रसिद्ध शास्त्रीय संगीत साधक एवम् गायक गुरुदेव कामतको निधनमा आइतबार राष्ट्रिय झण्डा आधा झुकाउने निर्णय गरेको छ ।

मधेशका मुख्यमन्त्री सतिशकुमार सिंहले शोक वक्तव्य जारी गर्दै गायक कामतको निधन भएको शोकमा राष्ट्रिय झण्डा आधा झुकाउने निर्णय गरिएको जानकारी दिए ।

सिरहाको पोखरभिण्डास्थित आफ्नै निवासमा गायक कामतको ६९ वर्षको उमेरमा बिहीबार निधन भएको थियो । मृगौला फेल भएकाले फेर्न चिकित्सकले सुझाव दिए पनि आर्थिक अभावका कारण उपचार गराउन नसकेपछि उनी काठमाडौंबाट घर फर्किएका थिए ।

लोकप्रिय गायक कामतको निधनबाट स्तब्ध र मर्माहत भएको भन्दै मुख्यमन्त्री सिंहले शोक वक्तव्यमा भनेका छन्, ‘मनोरञ्जन र जीविकोपार्जनको माध्यमबाट नभएर शिक्षा, चेतना र संस्कार उन्नयनको लागि संगीत विधालाई आजीवन अघि बढाउनुभएका स्व. गुरुदेव कामतको निधनप्रति शोक प्रकट गर्न प्रदेश सरकारले मिति २०८१÷०४÷२० गते आइतबार राष्ट्रिय झण्डा आधा झुकाउने निर्णयसमेत गरेको छ ।’

कामतको सांगीतिक आराधना र उपासनाको यात्रा अत्यन्त कठिन र संघर्षपूर्ण रहँदै आएको आयो, तर जीवनको कठोरतम क्षणसँग लड्दै भिड्दै शास्त्रीय तथा सुगम संगीत परम्परालाई थप सिर्जनात्मक र उत्कर्षोन्मुख बनाउन उनले पुर्‍याएको योगदान सदैव स्मरणीय रहने मुख्यमन्त्री सिंहले उल्लेख गरेका छन् ।

उनले गायक कामतको सांगीतिक स्वरको समग्रता र सम्पूर्णताले मधेशको भूमिलाई अनन्तकालसम्म गौरव–गरिमाबाट विभूषित गरिरहने विश्वास व्यक्त गरेका छन् ।