पजेरो सुविधा त्यागेका चितवन-२ का पूर्व सांसदले रविलाई भने- कुनै दिन सार्वजनिक बसमै भेटौँला

चितवन । नेकपा एमालेका नेता काशीनाथ अधिकारीले राष्ट्रिय स्वतन्त्र पार्टीका सभापति रवि लामिछानेलाई सार्वजनिक बसमा कुनै दिन भेट्ने आह्वान गरेको फेसबुक पोष्ट सामाजिक सञ्जालहरूमा आज चर्चामा छ ।

पछिल्ला दिनमा राजनीतिक दलका नेता पद प्रतिष्ठामा बसेपछि भुइँमान्छेको जीवनबाट टाढा विलासी जीवनयापन गर्ने टिप्पणी बढ्दै गएको समयमा उनले यो स्टाटस पोष्ट गरेका हुन् ।

राजनीतिकको माथिल्लो पदमा बसेर सार्वजनिक यातायातमा सवार गर्न चुनौती दिने काशीनाथ अधिकारी को हुन् त ?

काशीनाथ अधिकारी चितवनका बासिन्दा हुन् । उनको घर चितवनको रत्ननगर नगरपालिका वडा नम्बर ९ मा पर्छ । २०१६ सालमा जन्मिएका अधिकारी तत्कालीन नेकपा मालेमार्फत चितवनबाटै भूमिगत राजनीति गरेका व्यक्ति हुन् ।

चितवनको तत्कालीन कृषि क्याम्पसमा कृषि विषयमा स्नातक पढ्दापढ्दै उनी राजनीतिमा लागेका थिए । २०३८ सालदेखि भूमिगत राजनीति गरेका अधिकारीले चितवन र मकवानपुरमा समेत तत्कालीन पार्टी प्रमुख भएर काम गरे ।

२०४६ सालको जनआन्दोलन चितवनमा उनैको नेतृत्वमा भएका थियो । २०४७ सालपछि खुला राजनीतिमा आएका अधिकारी २०४९ सालदेखि नेकपा एमालेको केन्द्रीय कमिटीमा छन् । हाल उनी नेकपा एमाले स्थायी कमिटी सदस्य तथा संगठन विभाग प्रमुख समेत हुन् ।

चितवन घर भए पनि अधिकारीको बसाइ काठमाडौंमा छ । उनी नेकपा एमालेमा पूर्णकालीन छन् । नेकपा एमालेको पार्टी कार्यालय हालको च्यासलमा आउन उनी बस्ने डेरा रानीवनबाट दैनिक आउजाउ गर्नुपर्छ ।

अधिकारी भन्छन्,- डेराबाट दिनदिनै सार्वजनिक यातायातमा आउने भएकोले अहिलेका केही नेता चढेजस्तो यो मेरो काउन्टमा पर्ने विषय त होइन । तर, रवि जीको सार्वजनिक बसमा यात्रा गरेको फोटो देखेपछि सार्वजनिक बसको यात्रा गर्ने विषयले छोयो । कुनैदिन उहाँसँग भेटिएका जस्तो लागेर लेखेको हुँ ।

पार्टीको केन्द्रीय कमिटीमा मात्रै होइन तीन पटकसम्म संसदीय अभ्यास पनि अधिकारीले गरिसकेका छन् । रविसँगको उनको संयोग के मिल्छ भने, अधिकारी पनि पहिलो पटक चितवन २, कै निर्वाचित सांसद थिए । उनले २०५१ सालमा चितवन २ बाट संसदीय निर्वाचन जितेका थिए ।

त्यही बेलादेखि सांसदलाई प्राडो, पजेरो चाहिने संस्कृति भित्रिएको उनको बुझाइ छ । त्यतिबेला उनको भागमा पनि गाडी सुविधा आएको थियो ।

अधिकारी भन्छन्,- मैले गाडी सुविधा लिएँ । तर, मेरो सुविधामा प्रयोग भएन पार्टीलाई दिएँ । आफूलाई सार्वजनिक यातायात नै ठिक थियो ।

त्यसपछि राष्ट्रियसभा सदस्य र दोस्रो संविधानसभा निर्वाचनमा संविधानसभा सदस्यमा उनलाई पार्टीले समानुपातिक सूचीमा राखेको थियो । ती दुई पटक पनि उनले व्यक्तिगत गाडीको प्रयोग गरेनन् ।

सार्वजनिक यातायात नै चढ्ने गरे जसरी ६५ वर्षको उमेरमा अहिले पनि सार्वजनिक बस चढ्छन् ।

राजनीतिक दलहरूमा लाग्नेहरूको जीवन सादा आवश्यक हुन्छ भन्ने बुझाइ उनको छ । पार्टीले के दिन्छ भन्दा पनि नागरिकलाई इमानदारितापूर्वक सेवा दिनुपर्छ भन्छन् अधिकारी ।

उनको यो भनाइलाई चितवनका पार्टी प्रमुख भइसकेका नेकपा एमाले चितवनका नेता विजय सुवेदी पनि समर्थन गर्छन् ।

मकवानपुरबाट भूमिगत राजनीतिक जीवन सुरु गर्नेबेला सुवेदीले अधिकारीसँग भेट हुने मौका पाए । अझ उनी नै प्रमुख हुँदा राजनीतिक संस्कार सिकेको उनको भनाइ छ ।

काशीनाथ अधिकारीलाई भेटेको ४० वर्षभन्दा बढी भए पनि उनको साधारण जीवनशैलीले सधैँ प्रभावित भएको सुवेदी बताउँछन् ।

उनले नेपाल प्रेससँग कुरा गर्दै भने,- चिनेको केही समयमा नै राजनीतिक दलका नेताहरूमाथिको श्रद्धा घट्दै गएको हुन्छ । तर उहाँसँगको चिनजान र राजनीतिक संगतको समय जति बढ्दै गयो त्यति श्रद्धा बढ्दै गएको छ ।