माधव नेपाललाई नेता व्यवस्थापनको सकस- पदाधिकारीका आकांक्षी धेरै हुँदा झन् अलमल

काठमाडौं । नेकपा एकीकृत समाजवादीका अध्यक्ष माधव नेपाललाई पार्टीभित्र नेता व्यवस्थापनमा सकस हुँदा पदाधिकारी चयन प्रक्रियामा ढिलाइ हुने भएको छ । महाधिवेशन भएको एक महिनापछि केन्द्रीय कमिटीलाई पूर्णता दिएका अध्यक्ष नेपालले पदाधिकारी चयन गर्न अझै कम्तीमा एक महिनाभित्र पनि हुननसक्ने देखिएको हो ।

आकांक्षी धेरै भएपछि विधानविपरीत सदस्य संख्या बढाएर केन्द्रीय कमिटी २९९ बाट ३४४ सदस्यीय पुर्‍याएको थियो । तर, अहिले पदाधिकारीमा पनि पुरानै र नयाँ कमिटीमा आएकाहरूले पनि आकांक्षा राखेपछि अध्यक्ष नेपाललाई सकस परिरहेको छ ।

अब केन्द्रीय कमिटीले पूर्णता पाएपछिको पहिलो बैठक बसेपछि मात्रै पदाधिकारी चयन प्रक्रिया अघि बढ्ने नेता सोमप्रसाद पाण्डेले बताए ।

उनले भने, ‘अब केन्द्रीय कमिटीको पूर्ण बैठक बस्छ । त्यो बैठक अब चाँडोमा १५ दिपछि मात्रै बस्छ होला । त्यसपछि मात्रै पदाधिकारी चयन प्रक्रिया अघि बढ्छ ।’

उनले अहिलेसम्म पदाधिकारीमा नेताहरू नखुलेको जिकिर गरे ।

पाण्डेले थपे, ‘बढीमा एक महिनाभित्र हामीले टुंग्याउने भनेका छौं । अहिले वर्षातको समय पनि छ । कोही साथीहरू जुम्ला हुम्ला, दार्चुलातिर पनि हुनुहुन्छ उहाँहरूलाई आउन समस्या हुन्छ । वर्षा अलिक कम भएपछि मात्रै बैठक बस्छ ।’

तर, आकांक्षी धेरै भएर पर धकेलियो भनिन्छ नि भन्ने जिज्ञासामा उनी भन्छन्, ‘त्यस्तो होइन, अहिलेसम्म आकांक्षी नै देखिनुभएको छैन । समय नभएर होला नेताहरूले इच्छा व्यक्त गर्नुभएको छैन ।’

असार १६ देखि २० गतेसम्म भएको महाधिवेशनले सर्वसम्मत नेतृत्व चयन गर्ने नाममा अपूरो कमिटी घोषणा गरेर टुंग्याएको थियो । त्यसबेलामा तीन पदाधिकारीसहित ९३ सदस्यीय केन्द्रीय कमिटी मात्रै घोषणा भएको थियो। तर, अहिले आकांक्षी धेरै भएपछि संख्या बढाइएको छ ।

तर, केन्द्रीय कमिटीजस्तो पदाधिकारी संख्या बढाउने सम्भावना नरहेको नेता पाण्डेले बताए ।

महाधिवेशनले अध्यक्षमा माधव नेपाल, सम्मानित नेतामा झलनाथ खनाल र महासचिवमा घनश्याम भुसाललाई नै दोहोर्‍याएको थियो । अब १८ पदाधिकारी छान्न बाँकी छ ।

नेकपा एसमा वरिष्ठसहित ७ उपाध्यक्ष, ४ उपमहासचिव र ७ सचिव चयन गर्नुपर्नेछ । त्यसो त आवश्यकताअनुसार वरिष्ठ नेता पद पनि सिर्जना गर्नसक्ने पार्टीले नै निर्णय गरेको छ । वरिष्ठ उपाध्यक्षमा राजेन्द्र पाण्डे र बेदुराम भुसालको दाबी छ ।

नेतृत्व नै पुरानै दोहोरिएकाले अहिलेकै कमिटीमा केही नयाँ सदस्य हेरफेर गरेर पदाधिकारी टुंग्याउने अध्यक्ष नेपालको तयारी छ । तर, त्यो सहज छैन । पार्टीमा पदाधिकारीमा नयाँ अनुहार ल्याउनुपर्नेमा पनि उस्तै दबाब छ ।

अहिले पनि अध्यक्षमा महासचिव भुसालले नेता खनालको समर्थनमा दाबी गरेपनि सहमतिको लागि पुरानै पदमा दोहोरिएका थिए ।

नेता राजेन्द्र पाण्डे केन्द्रीय सदस्यहरूको शपथपछि मात्रै यो विषय अघि बढ्ने बताए ।

उनले भने, ‘केन्द्रीय सदस्य चयन भइसकेको छ । अब उहाँहरूको शपथ र निर्वाचन कार्यतालिका तय गर्छौँ । केन्द्रीय कमिटीले पदाधिकारी चुन्ने हो ।’

पार्टीका आकांक्षी धेरै भएपनि पदाधिकारी चयन प्रक्रियामा नेतृत्वलाई सहज नभएको अर्का एक नेताले बताए ।

ती नेताले भने, ‘हामीले बाहिरबाट यसो हेर्दा पदाधिकारीमा संख्या भन्दा तेब्बर आकांक्षी छन्, धेरै आकांक्षी भएकाले अहिले यो सम्भावित भन्न पनि सकिने अवस्था छैन । सर्वसम्मत गर्ने भनिएको छ, तर सहज हुने सम्भावना छैन ।’

पछिल्लो समय एकजुट भएर नेतृत्वमा दाबी गरेका सम्मानित नेता खनाल र महासचिव भुसालले पनि अध्यक्ष नेपालमाथि दबाब बढाउँदै लगिरहेका छन् । पदाधिकारी चयन प्रक्रियामा पनि हावी हुनसक्ने भएकाले अध्यक्ष नेपाल आन्तरिक गृहकार्य पनि सँगै गरिरहेको बताइन्छ ।

केन्द्रीय सदस्यहरूको शपथपछि पदाधिकारी चयन प्रक्रिया अघि बढ्ने प्रवक्ता जगन्नाथ खतिवडाले बताए ।

‘अहिले ३ सय ४४ सदस्यीय केन्द्रीय कमिटीको घोषणा गरिएको छ । अब केही दिनभित्र यी सबै केन्द्रीय सदस्यहरूको शपथ समारोह राखिनेछ। बैठक बस्छ’, शुक्रबारको केन्द्रीय कमिटी बैठकपछि भनेका थिए, ‘त्यसपछि पदाधिकारीहरू छनोट हुनेछ । धेरै छिटो व्यवस्थापन गरेर पदाधिकारी चयन हुनेछ ।’