रियालिटी शोका नाममा सीमाहीन अश्लीलता, ‘ब्लाइन्ड डेट’ माथि रोक लगाउन दर्शकको माग

काठमाडौं । एउटा कथित रियालिटी शो ‘ब्लाइन्ड डेट’ को नाम धेरैले सुन्नुभएको होला । रियालिटी शो भनिए पनि यो शोमा रियालिटी केही पनि छैन । छ त केबल भरमार अश्लीलता ।

‘ब्लाइन्ड डेट’ को अर्थ हो आपसमा अपरिचित दुई युवा र युवती एकैपटक डेटिङ स्पटमा भेट्ने र एक अर्कालाई बुझ्ने । यो अवधारणामा विश्वका थुप्रै राष्ट्रमा राम्रा रियालिटी शोहरू छन् । त्यसकै कपी नेपालमा पनि गर्न थालिएको हो । तर, अक्कलविनाको भद्दा नक्कल झैँ भएको छ नेपालमा । अहिले चलिरहेको ब्लाइन्ड डेटको तेस्रो सिजन यति अपाच्य र घिनलाग्दो छ कि दर्शकले यसमाथि प्रतिवन्धकै माग गर्न थालेका छन् ।

सुरुमा दुई कथितरूपमा अन्जान व्यक्तिहरू आउँछन् । परिचय गर्छन् । त्यसपछि सिधै सुरु हुन्छ द्वीअर्थि संवाद । उनीहरू घुमाएर फिराएर यौनजन्य भन्दा बाहेकका अरु कुरै गर्दैनन् । जोडीहरूको गफ सुन्दा कहीँ कतै पनि लाग्दैन कि त्यो ‘ब्लाइन्ड डेट’ अर्थात पहिलो अन्जान भेट हो । न त उनीहरूबीच हुने कुराकानीहरू स्वस्फुर्त हुन् । उनीहरूले बोलेका ९० प्रतिशत संवादहरू स्क्रिप्टेड हुन् भन्ने सहजै अनुमान लगाउन सकिन्छ ।

ब्लाइन्ड डेटको पहिलो सिजन २०७७ सालमा प्रशारण भएको थियो । स्क्रिप्टेड नै भए पनि पहिलो सिजन केही हदसम्म मनोरञ्जक थियो र धेरै किशोर-किशोरीहरू यसमा झुम्मिएका थिए । यो शोको लोकप्रियतालाई हेरेर हिमालय टेलिभिजनले खरिद गरेर प्रसारण थाल्यो । तर, विस्तारै अश्लील हुन थालेपछि यसलाई बन्द गर्न टिभी बाध्य भयो । अहिले यो शो युट्यूवमा मात्र आउँछ । तर, आफ्ना छोराछोरीले हेर्लान् कि भनेर बाबुआमा त्राहटीमाम बन्नुपर्ने अवस्था आएको छ । यो शो अहिले एउटा पोर्न सिरियल भन्दा कम छैन ।

अहिले यो शोमा द्विअर्थी कुरामात्र हुँदैन, खुलेरै यौनजन्य संवाद र अश्लील क्रियाकलापहरू समेत हुन थालेका छन् । केटा र केटी अर्धनग्न भएर एउटै ओछ्यानमा सुतेका हुन्छन् । केटाले ओछ्यानमा ‘स्टामिना’ देखाउन नसेकको भनेर केटीले गुनासो गर्छिन् । एउटै केटी कहिले यो केटासँग, कहिले त्यो केटासँग शारीरिक सम्बन्ध राख्छिन् । एउटा केटीकै सामुन्ने दुई केटा र केटी फिजिकल हुन्छन् । एउटा भुस्तिघ्रे कार्यक्रमभरि अन्डरवेयरमा मात्रै देखिन्छ ।

माया-प्रेम भन्ने कुरा दूरदूरसम्म कार्यक्रमको फर्म्याटमा छैन । छ त केवल अश्लीलता अनि छाडापन । निर्गतिलाे पृष्ठभूमिका केही युवक र युवतीलाई विभिन्न भूमिका दिएर कथित रियालिटी शो निर्माण गरिएको छ । उनीहरूको वास्तविक जीवन र कार्यक्रममा निभाएको भूमिकामा कुनै पनि तादाम्यता छैन । यो कार्यक्रममा भाग लिइसकेपछि उनीहरू समाजमा शिर ठाडो गरेर हिँड्न सक्लान् त भन्ने प्रश्न उठ्छ । यस्तो लाग्छ कि कार्यक्रममा भाग लिनका लागि पहिलो शर्त नै ‘चारित्रिक पतन’ हो । समाजमा अलिकति पनि इज्जत भएका युवायुवतीले यस्तो कार्यक्रममा भाग लिन सय चोटि सोच्नुपर्छ ।

कार्यक्रमको डाइरेक्टरलाई देख्यो भने त उदेक नै लाग्छ । टीआरपीका लागि उनी जे पनि गर्न तयार छन् । जति तल पनि गिर्न तत्पर छन् । उनको लवाइ र अन्दाज एउटा उदेकलाग्दो छ । डाइरेक्टर आफैं प्रतियोगी भन्दा छाडा भएर प्रस्तुत हुन धक मान्दैनन् । उनको दिमागमा भ्यूज र टिआरपीभन्दा सायद अरु केही पनि छैन । कमेन्ट बक्समा हेर्ने हो भने दर्शककाे गालीगलौज मात्र हुन्छ । कार्यक्रममाथि रोक लगाउन दर्शकले माग गरिरहेका हुन्छन् । तर, निर्माता निर्देशकलाई परवाह छैन । उनीहरू भ्यूजमै रमाइरहेका छन् ।

नेपालको कानूनअनुसार सार्वजनिक स्थानमा अश्लीलता प्रदर्शन गर्न पाईँदैन । युट्यूव भनेको पनि सार्वजनिक प्लेटफर्म हो । अहिले सबैको हातमा मोबाइल र इन्टरनेट छन् । नेपालमा बच्चादेखि बुढासम्मले युट्यूव हेर्छन् । यस्ता सामग्रीहरू बालबच्चाको पहुँचमा पुग्नु भनेको असाध्यै ठूलो चिन्ताको विषय हो । डिस्क्लेमर लेखेको भरमा १८ वर्ष मुनिका बालबालिकाहरू यो कार्यक्रम हेर्न पक्कै रोकिँदैनन् । त्यसमाथि ‘ठगलाइफ नेपाल’ जस्तो ११ लाख फलोअर्स भएको पेजले यो अश्लील कार्यक्रमलाई प्रवद्र्धन गर्दै आएको छ ।

मेकर्सले त भ्यूज बलुटिरहेका छन्, डलर कमाइरहेका छन् । तर, यसले समाजलाई कता लैजान्छ ? युवाहरूलाई कस्तो सन्देश दिन्छ ? नेपालमा सामाजिक सञ्जाललाई कडासँग नियमन गर्ने एउटा बलियो कानून र सरकारी संयन्त्रको आवश्यता टड्कारोरूपमा खट्किरहेको छ । कुनै पनि निकायमा दर्ता नभइकन एउटा युट्यूव अकाउन्ट खोलेका भरमा जस्ता पनि सामग्री प्रसारण गर्ने छुट कहिलेसम्म दिने ?

एउटालाई आँखा चिम्लिने हो भने भोलि भ्यूज र टीआरपीका लागि यस्ता खालका कार्यक्रमको भेल उर्लने निश्चित छ । ब्लाइन्ड डेटजस्तो आपत्तिजनक कार्यक्रमलाई तत्काल बन्द गराउनेतर्फ नियामक निकायहरूको ध्यान जावस । कुनै सशुल्क एपमा राख्नु बेग्लै कुरा हो, तर युट्यूवजस्तो सबैको पहुँचमा रहेको प्लेटफर्ममा यसलाई अनुमति दिनु हुँदैन ।