एआई भिडिओ भाइरल भएपछि अभिषेकले मुख खोले, औँठी देखाउँदै भने- स्टिल म्यारिड !

काठमाडौं । बलिउड अभिनेता अभिषेक बच्चनले पत्नी ऐश्वर्यासँग आफ्नो सम्बन्ध नतोडिएको जिकिर गरेका छन् । लामो समयदेखि चल्दै आएको डिभोर्सको चर्चाबारे उनले पहिलो पटक मुख खोलेका हुन् ।

हालै मात्र एउटा ‘एआई निर्मित’ अभिषेकको भिडिओ सामाजिक सञ्जालमा भाइरल भइरहेको छ, जसमा उनले पत्नी सित डिभोर्स भएको बताएका छन् । यसलाई धेरैले आधिकारिक मानेपछि अभिषेकले प्रतिक्रिया दिन बाध्य भए ।

बलिउड युके मिडियासँग अन्तरवार्ता दिने क्रममा आफ्नो विवाहको औँठी देखाएर अभिषेकले भने, ‘स्टिल म्यारिड’ (अझै विवाहित छु) ।

त्यसपछि उनले थपे, ‘मलाई यस विषयमा अरू केही भन्नु छैन । तपाईँहरूले नै बढाइचढाइ गरिरहनु भएको छ । म बुझ्छु कि यस्तो किन गरिरहनु भएको छ । तपाईँहरूले केही स्टोरी फाइल गर्नुपर्ने हुन्छ । यो ठीक छ । हामी सेलिब्रिटी हौँ । यो हामीले ग्रहण गर्नुपर्छ ।’

तर, अभिषेकको यो बयानले फ्यानहरूको चित्त बुझाउन भने सकेको छैन । उनीहरूले औपचारिक डिभोर्स गरिनसकेको भए पनि धेरै समयदेखि अलग अलग बस्दै आइरहेका छन् । यस विषयमा अभिषेकले कुनै व्याख्या गरेनन् ।

हालै मात्र अभिषेकले एउटा इन्स्टाग्राम पोस्टमा लाइक गरेका थिए, जसमा डिभोर्स गर्नैपर्ने अवस्थाको विषयमा उल्लेख थियो । यसले गर्दा पनि उनी डिभोर्सको मनस्थितिमा रहेको आँकलन गरिएको छ ।

हालै मात्र मुकेश अम्बानीको छोराको बिहेमा अभिषेक र ऐश्वर्या बेग्लाबेग्लै उपस्थिति जनाएका थिए । अभिषेक आफ्नो परिवारसँग गएका थिए भने ऐश्वर्या छोरी लिएर पुगेकी थिइन् ।