अमेरिका, रुस तथा जापानसहितका सात देशका बंगालदेशी राजदूत तथा उच्चायुक्त फिर्ता

काठमाडौं । बंगलादेशमा नयाँ सरकार आएसँगै राजदूतहरूको फिर्ता सुरु भएको छ । बंगलादेशी अखबार प्रोथम आलोका अनुसार छ देशका बंगलादेशी राजदूतहरू फिर्ता हुने भएका छन् ।

फिर्ता हुने देश तथा राजदूतहरूमा अमेरिकाका महोमद इमरान, रुसका कामरुल असन, जापानका शाहाबुदिन अहमद, संयुक्त अरब इमिरेट्सका महमद अबु जफर, जर्मनीका मुसरफ हुसेन भुइयान, साउदी अरेबियाका महमद जाभेद पटवरी रहेका छन् ।

यस्तै माल्दिभ्समा रहेका बङ्गलादेशका उच्चायुक्त पनि फिर्ता भएको प्रोथम आलोले जानकारी दिएको छ । गत साउन २१ मा जबरजस्त सत्ता छोडेर भारत शरण लिन बाध्य भएकी हसिना सत्ता पल्टेपछि बंगालादेशमा अस्थिरता तथा हिंसा सुरु भएको हो ।

खास गरी अल्पसङ्ख्यक तथा हसिनाको दल अवामी लिगका नेता तथा कार्यकर्ताहरुमाथि हिंसा बढेको छ ।

कतिसम्म भने बिहीबार बङ्गलादेशका राष्ट्रपति बङ्गबन्दु शेख मुजिबर रहमानको स्मृति दिवस मनाउन पुगेकाहरूलाई पनि कुटपिट गरेर सम्मान प्रकट गर्न रोकिएको थियो ।

यसमा शेख हसिनाका छोरा सजिव वाजेद रोयले सार्वजनिक रुपमा आपत्ति जनाएका छन् । उनी हाल आइटी विज्ञको रुपमा अमेरिकामा काम गरिरहेका छन् ।