बेदुरामको चेतावनी- दुई दलीय व्यवस्थाका लागि संविधान संशोधन हो भने स्वीकार्दैनौं (भिडिओ)

काठमाडौं । नेकपा एकीकृत समाजवादीका नेता एवं राष्ट्रियसभा सदस्य बेदुराम भुसालले लोकतान्त्रिक प्रणालीलाई असर गर्ने कुनै पनि काम स्वीकार्य नहुने चेतावनी दिएका छन् ।

अहिले संविधान संशोधनका चर्चा धेरै भइरहेको भन्दै संविधान संशोधन गर्ने शर्तमा नयाँ गठबन्धन बनाइएको उनको भनाइ थियो । संविधान असंशोधनीय दस्तावेज नभएको तर संशोधन के उद्देश्यले गर्ने ? कस्तो संशोधन गर्ने ? केका निम्ति गर्ने ? भन्ने प्रश्न रहेको बताए ।

भुसालले भने, ‘अहिले संविधान संशोधनको खुब चर्चा हुने गरेका छन् । तर, संशोधन के उद्देश्यले गर्ने ? कस्तो संशोधन गर्ने ? केका निम्ति संशोधन गर्ने ? के अहिले भनिए जस्तै दुई दलीय व्यवस्था कायम गर्नका निम्ति संशोधन हो ? समानुपातिक समावेशी सहभागितामूलक लोकतान्त्रिक प्रणाली तोड्न, भत्काउनका निम्ति हो । यदि यसो हो भने यो स्वीकार्य हुनेछैन । यसलाई कुण्ठित गर्ने कुरा सहन सक्दैनौँ । दुई दलका बीचको सहमति राष्ट्रिय सहमति हुन सक्दैन ।’

संविधान संशोधनको उद्देश्य स्पष्ट हुन नसकेको भन्दै उनले दुई दलीय व्यवस्था कायम गर्ने वा समानुपातिक समावेशी हटाउने काम स्वीकार्य नहुने जिकिर गरे । दुई दलका बीचमा सहमतिलाई राष्ट्रिय सहमतिको भाष्य सिर्जना गर्न खोजिएको उनको टिप्पणी छ ।

भुसालले संविधान निर्माणपछि बनाउनुपर्ने कानूनमा सरकारले गरेको कामका बारेमा सदनलाई जानकारी हुनुपर्ने बताए ।

महत्वपूर्ण विधेयक निर्माणको गति निकै सुस्त भएको भन्दै उनले साच्चै संविधान संशोधन गर्ने हो भने राष्ट्रिय बहसको आवश्यकता पर्ने बताए ।