मकवानपुरको बकैया गाउँपालिकामा अनिश्चितकालीन तालाबन्दी

हेटौंडा । मकवानपुरको बकैया गाउँपालिका कार्यालयमा अनिश्चितकालीन तालाबन्दी गरिएको छ ।

गाउँपालिकामा बढेको अनियमितताको विषयमा आफूहरुले पटकपटक ध्यानाकर्षण गर्दासमेत अध्यक्ष धर्मराज लामिछानेले आफूखुसी कर्मचारीको सरुवा, प्रध्यानाध्यापकलाई दबाब दिएर राजीनामा गर्न लगाउनेलगायतको विषयमा कुनै कदम नचालेको भन्दै एमाले, माओवादीलगायतले तालबन्दी गरेका हुन् ।

तिनीहरुले विद्यालय व्यवस्थापन समितिलाई कुनै जानकारी नदिई शिक्षा शाखा प्रमुखले प्रस्ताव गरेकोबाहेक शिक्षकलाई विद्यालय पठाउने काम नगरेको, सरकारी सवारीसाधनको अनियमितता, इन्धनमा घोटाला भएको आरोप लगाएका छन् ।

अध्यक्ष लामिछानेले एकलौटी रूपमा निर्णय गर्ने प्रवृत्ति बढेकाले विरोध गर्नुपरेको माओवादीबाट गाउँपालिका उपाध्यक्ष विजयी भक्तबहादुर खत्रीले बताए । अध्यक्षले छलफल र समन्वय नै नगरी मनलाग्दी गर्न लागेपछि आफूहरुले बाध्य भएर तालाबन्दी गर्नुपरेको उनले बताए ।

यसैबीच गाउँपालिकामा क्रियाशील पाँच राजनीतिक दलले आज विज्ञप्ति निकाल्दै गाउँपालिकाको अराजक क्रियाकलाप नसच्याए थप कडा आन्दोलनको चेतावनी दिएका छन् ।