कमला ह्यारिसलाई कम्युनिष्ट करार गर्ने ट्रम्प र एलन मक्सको प्रयास, बारम्बार भन्दैछन्- कमरेड कमला

काठमाडौं । आगामी नोभेम्बरमा हुने अमेरिकी राष्ट्रपतीय चुनावमा अभूतपूर्व रुपमा कम्युनिष्टको चर्चा भएको छ । यो चर्चा सुरु गर्ने अमेरिकी राष्ट्रपति डोनाल्ड ट्रम्प हुन् । उनको चर्चा अमेरिकाले नाकाबन्दी लाएका क्युवा रउत्तर कोरिया जस्ता कम्युनिष्ट देश तथा व्यापार युद्ध सुरु गरेको कम्युनिष्ट देश चीनको कारण भएको होइन ।

उनले कम्युनिष्ट भनेर चर्चा गरेका पात्र हुन् राष्ट्रपतीय उम्मेदवार कमला ह्यारिस । डेमोक्रेटिक पार्टीकी उम्मेदवार कमलालाई ट्रम्पले पछिल्लो समयमा कम्युनिष्ट भन्दै आएका छन् । शनिबारको एक राजनीतिक समारोहमा ट्रम्पले कमला ह्यारिसलाई ‘कमरेड कमला’को उपमा दिएर । र, भने, ‘हिजोको उनको मन्तव्यमा कमला पूर्ण कम्युनिष्ट भइन् । तपाइँले त्यो सुन्नु भयो? उनी पूर्ण कम्युनिष्ट भइन् ।’

कमरेड कमलाको बारेमा सामाजिक संजालमा कमलाको सम्बोधन गरेको तस्बिर अगाडि भिड र अनि हँसिया हथौडा भएको फोटो राखेर ट्रम्पले कमलाको खिल्ली उडाएका छन् । आफ्नै स्वामित्व भएको सामाजिक संजाल ट्रूथ सोसल देखि फेसबुक तथा एक्समा उनले यस्तो भनिरहेका छन् ।

यसबारेमा अमेरिकी मिडियाहरुमा पनि समाचार आएका छन् । परम्परागत शक्ति पक्षधर फक्सदेखि डेमोक्रेटिक दलसँग नरम हुने सीएनएनसम्म यस्ता खबर आएका छन् । सीएनएनले कमलालाई कम्युनिष्ट भन्दा मतदातामा के प्रभाव पर्छ भन्नेबारेमा बसह गरेको छ भने फक्सले कमलालाई ट्रम्पले कम्युनिष्ट भनेको भनेर चर्चा गरेका छन् ।

किन कमरेड कमला भन्दै कम्युनिष्ट कुरा जोड्दैछन् ट्रम्प ?

कमलाले आफ्नो राजनीतिक भाषणमा खानेकुराको दाम तोक्ने बताएकी थिइन् । धेरै सित्तैमा दिने कुराहरुको सूची बनाएकि थिइन् । यो कुरा वितरणमुखी भएको, कम्युनिष्टमुखी भएको र सोभियत संघ शैलिको भएको भन्दै ट्रम्पले कमरेड कमला भनेका हुन् । उनले यस्तो गर्दा खाने कुराको दाम बढ्ने, पचास प्रतिशतसम्म पुग्ने तर्क गरेका छन् ।

यस्तै कमलाले पहिलोपटक घर किन्नेहरुलाई सहुलियत दिने देखि पहिलो सन्तान भएकाहरुलाई ६ हजार डलरसम्मको कर क्रेडिट दिने जस्ता योजना ल्याएको फक्स न्यूजले लेखेको छ । यि कुरालाई ट्रम्पले कम्युनिष्ट भन्दै आलोचना गरेका छन् । दाम तोक्ने काम विश्वका अरु देशहरुमा असफल भइसकेको भन्दै कमलाको ट्रम्पले आलोचना गरेका हुन् ।

अरु देशको कुर गर्दै उनले सोभियत संघको नाम जोडेका छन् । उनले भेनेजवेलाका राष्ट्रपति निकोलस मदुरोको जस्तो योजनाहरु ल्याएको भन्दै कमलाको आलोचना गरेका छन् । कमला कम्युनिष्ट र सोसिअलिस्ट भन्दै उनले अमेरिकी अर्थतन्त्र सखाप पार्ने आरोप ट्रम्पले लाएका छन् ।

सीएनएनले ट्रम्पले कमलालाई कमरेड भन्दा मतदातामा कस्तो प्रभाव होला भनेर मतदान विज्ञ फ्राङ्क लुचलाई सोधेका छन् । जवाफमा लुजले भनेका छन्, ‘अमेरिकी जनताले वैचारिक कुरा होइन दैनिक कुरामा ध्यान दिनेछन् । खाद्यान्न, इन्धन र घरको मुल्य बढेकोमा उनीहरु चिन्तित छन् ।’

यसअघि एलन मस्कले कमला ह्यारिसलाई कम्युनिस्ट भन्दै उनी निर्वाचित भएमा समाजवादी मोडेलको अमेरिका बनाउने दावी गरेका थिए । उनी सोभियत विचारबाट ग्रसित भएको आरोप समेत थियो ।