कार्यकाल सकेकी अस्ट्रेलियाली राजदूत भन्छिन्- नेपालबारे दुई किताब लेख्छु

काठमाडौं । हालासालै नेपालका लागि अस्ट्रेलियाको राजदूत रहेर बिदा भएकी राजदूत फेलिसिटी भोल्कले आफूले स्वदेश फर्केर नेपालबारेमा किताब लेख्ने बताएकी छिन् । पत्रकार कोषराज कोइरालासँगको कुराकानीमा भोल्कले यस्तो बताएकी हुन् ।

उनले अन्तरवार्तामा भनेकी छिन्, ‘नेपालको अनुभवमा आधारित आख्यान र गैरआख्यानमा आधारित दुईवटा पुस्तक लेख्ने मेरो योजना छ ।’ आफ्नो पुस्तक लेखनको लागि आफ्नो नेपाल आगमन भने भइरहने भन्दै भोल्कले भनेकी छिन्, ‘यो योजना कार्यान्वयनका लागि पनि म प्रत्येक वर्ष केही महिना काठमाडौँमा आउँछु ।’

३५ वर्षको कूटनीतिक सेवामा रहेकी भोल्कले बंगलादेश तथा लाओस्मा रहेका अस्ट्रेलियाली मिसन सकेपछि तथा दुई छोरीको जन्म भएपछि लेखन सुरु गरेको आफ्नो आधिकारिक वेबसाइटमा बताउँछिन् । भोल्कले सन २०१३ को जुलाईमा लाइट्निङ नामक किताब लेखेकी थिइन् भने त्यसपछि सन २०२० को सुुरुमा डिजायर लाइन लेखेकी थिइन् । यी दुवै कृतिहरु उपन्यास हुन् ।