तनहुँको घाँसीकुवामा भीषण पहिरो, पृथ्वी राजमार्ग अवरुद्ध (भिडिओ)

दमौली । तनहुँको व्यास नगरपालिका- १२ घाँसीकुवामा भीषण पहिरो गएको छ । साँझ पहिरो जाँदा पृथ्वी राजमार्गमा यातायात अवरुद्ध हुन पुगेको छ ।

सडकभन्दा ५० मिटरमाथिबाट आएको पहिरोले राजमार्गको भाग पुरेको छ । राजमार्ग सँगै निर्माणाधीन अस्थायी होटलहरुको संरचनामा समेत क्षति पुगेको छ । घटनास्थलको प्रकृति हेर्दा तत्काल पहिरो हट्ने सम्भावना छैन ।

पहिरो गएको सूचना प्राप्त हुने बित्तिकै व्यास नगरपालिकाका प्रमुख बैकुण्ठ न्यौपानेसहित नेपाली सेना र नेपाल प्रहरीको टोली घटनास्थल पुगेको छ ।

पहिरो गएको स्थलमा अहिले तनहुँका प्रहरी प्रमुख वीरेन्द्रबहादुर शाहीलगायतको टोली उद्धार कार्यमा जुटेको छ । पहिरोले कुनै मानवीय क्षति भए नभएको विस्तृत विवरण आउन बाँकी रहेको प्रहरी प्रमुख शाहीले बताए ।