प्रचण्डको सम्बोधन: कांग्रेस-एमालेले पटकपटक माओवादीलाई प्रयोग गर्दै धोका दिएको हिसाब खै ? (पूर्णपाठ) (भिडिओ)

काठमाडौं । नेकपा माओवादी केन्द्रका अध्यक्ष पुष्पकमल दाहाल प्रचण्डले प्रधानमन्त्री केपी शर्मा ओलीको चर्को आलोचना गरेका छन्। प्रतिनिधिसभाको बैठकमा उनले प्रमुख प्रतिपक्ष दलको नेताकाे रुपमा सम्बोधन गर्दै सरकार गठन प्रक्रियादेखि नै प्रश्न उठाए।

उनले भने, ‘इमानमात्र होइन, सरकारको जगमा कानून छैन, संविधान पनि छैन। म यो रोष्टमबाट फेरि एकपटक भन्छु, यो सरकार राजनीतिक बलमिच्याइँ र संविधानको अवहेलनाबाट बनेको असंवैधानिक सरकार हो। संविधानको धारा ७६ (२) अनुसार बनेको सरकारले विश्वासको मत लिन नसकेपछि स्वतः धारा ३ सक्रिय हुन्छ भनेर संविधानमा स्पष्ट व्यवस्था छ। अहिलेका प्रधानमन्त्रीले कुनै बेला आफैंले त्यसको एकदमै प्रष्ट व्याख्या गर्नुभएको भिडियो हिजोआजसमेत सामाजिक सञ्जालमा घुमिरहेको देख्छु, तर म कसैलाई नैतिकता सम्झाउन चाहन्नँ।’

उनले आफू सरकारलाई हनिमुन पिरियडसम्मै शंकाको सबै सुविधा दिने पक्षमा भएपछि गलत बाटोमा लागेकाले बोध्न बाध्य भएको बताए।

‘प्रमुख प्रतिपक्षी दलको नेताको रुपमा यो सम्मानित रोष्टम म अलि अगाडि नै पनि उपयोग गर्न सक्थेँ। गरिनँ। किनकि म सरकारलाई हनिमुन पिरियडसम्मै शंकाको सबै सुविधा दिने पक्षमा थिएँ। सरकारमाथि पहिलो बहस जनताको अदालतमा होस् भन्ने मेरो चाहना थियो। तर, ४० दिनभन्दा बढी समयसम्म सरकारको नियत र गन्तव्यको सूक्ष्म अवलोकनपछि म यो निष्कर्षमा पुगेको छु, सरकार अहंकारपूर्ण तर गलत बाटोतिर अग्रसर छ।’ उनले भने ।

उनले कांग्रेस-एमालेले पटकपटक माओवादीलाई प्रयोग गर्दै धोका दिएको भन्दै अहिले प्रश्न उठाउने नैतिक अधिकार नभएको जिकिर गरे।