यू-२० साफ : उपाधिका लागि नेपाल र बंगलादेश भिड्दै

काठमाडौं। घरेलु मैदानमा जारी साफ यू-२० च्याम्पियनसिप फुटबलको उपाधिका लागि नेपालले बुधबार बंगलादेशसँग खेल्दै छ।सातदोबाटोस्थित एन्फा कम्प्लेक्समा दिउँसो साढे २ बजे सुरु हुने खेलमा नेपाल आत्मविश्वासी देखिन्छ।

सेमिफाइनलमा नेपालले भुटान र बंगलादेशले साविक विजेता भारतलाई पराजित गरेका हुन्। दुवै खेल टाइब्रेकरसम्म पुगेका थिए। नेपालले यसअघि समूहगत चरणमा बंगलादेशससँग खेलेको थियो। उक्त खेल नेपालले २(१ गोलले जितेर समूह विजेताका रुपमा सेमिफाइनल यात्रा तय गरेको थियो।

पहिलो चरणमा श्रीलंकालाई हराएर सेमिफाइनलमा स्थान बनाएको बंगलादेश साविक विजेतालाई हराएका कारण बलियो आत्मविश्वासमा छ। गत संस्करणमा पनि फाइनल पुगेको बंगलादेश उपाधि भिडन्तमा भारतसँग पराजित भएको थियो। साफ यू-२० च्याम्पियनसिपको यो दोस्रो संस्करण हो।

यसअघि आयोजना भएका साफ यू-१८ च्याम्पिनयसिप र साफ यू-१९ च्याम्पियनसिप नेपालले एकएकपटक जितेको थियो। अघिल्लो वर्षदेखि भने यू-२० स्तरको साफ च्याम्पिनयसिप सुरु भएको हो।